რუსეთის ფედერაციის არმიამ კიევზე რაკეტებითა და დრონებით მასირებული დარტყმა განახორციელა. წინასწარი მონაცემებით, დაიღუპა 1 ადამიანი, 21 კი დაშავდა, – განაცხადა ქალაქის მერმა ვიტალი კლიჩკომ. სულ მცირე 13 ადამიანი ჰოსპიტალიზებულია, მათგან სამის მდგომარეობა მძიმეა.
კიევის საქალაქო სამხედრო ადმინისტრაციის ინფორმაციით, მთელი ქალაქის მასშტაბით 40-ზე მეტი ობიექტი დაზიანდა, მათ შორის რამდენიმე მრავალსართულიანი და კერძო საცხოვრებელი სახლი. გაჩნდა რამდენიმე ხანძარი. მეტროსადგურ „ლუკიანოვსკაიასთან“ მდებარე სავაჭრო ცენტრი „კვადრატი“ მთლიანად დაიწვა.
ადგილობრივი მედიის ვარაუდით, რუსეთმა კიევის მახლობლად მდებარე ქალაქ ბელაია ცერკოვზე ბალისტიკური რაკეტა „ორეშნიკით“ მიიტანა იერიში. უკრაინის ან რუსეთის ხელისუფლებას რაკეტის გამოყენება ოფიციალურად ჯერ არ დაუდასტურებია. სოციალური ქსელის მომხმარებლებმა რამდენიმე რაკურსიდან გადაღებული ვიდეოები გამოაქვეყნეს, სადაც ჩანს „ორეშნიკისთვის“ დამახასიათებელი რაკეტის საბრძოლო ბლოკების განცალკევება და ძლიერი აფეთქებები. თუ ეს ინფორმაცია დადასტურდა, ომის დაწყებიდან ეს „ორეშნიკის“ გამოყენების მესამე დაფიქსირებული შემთხვევა იქნება.