აშშ-მა და ირანმა მიაღწიეს „პრინციპულ შეთანხმებას“, რომელიც ჰორმუზის სრუტეში ნაოსნობის აღდგენას ითვალისწინებს, – წერს The New York Times-ი საკუთარ წყაროებზე დაყრდნობით.
შეთანხმების დეტალები ჯერ კიდევ დასაზუსტებელია და ჯერჯერობით გაურკვეველია, თუ რა სახის კონტროლს შეინარჩუნებს ირანი სრუტეზე. ამავდროულად, ირანის უზენაესი ლიდერის, მოჯთაბა ხამენეის სამხედრო მრჩეველმა, რომლის ციტირებასაც ირანული სააგენტოები ახდენენ, განაცხადა, რომ ისლამურ რესპუბლიკას სრუტის მართვის „კანონიერი უფლება“ აქვს.
ერთი დღით ადრე ირანის სამმა მაღალჩინოსანმა The New York Times-თან საუბარში აღნიშნა, რომ ირანი დათანხმდა ურთიერთგაგების მემორანდუმს, რომელიც სრუტეში ნაოსნობის განახლებას ითვალისწინებს. სანაცვლოდ, მათი თქმით, აშშ მოხსნის ირანის პორტების სამხედრო-საზღვაო ბლოკადას. შეთანხმება ასევე ითვალისწინებს საბრძოლო მოქმედებების შეწყვეტას ყველა მიმართულებით, ლიბანის ჩათვლით, დასძინეს წყაროებმა.
თავად ტრამპმა კვირას, 24 მაისს, სოციალურ ქსელ Truth Social-ში დაწერა, რომ თუ ის ირანთან გარიგებას დადებს, „ეს იქნება კარგი და სწორი გარიგება“ და არა ისეთი, „როგორიც ობამას დროს იყო“. „ჩვენი შეთანხმება სრულიად საპირისპიროა. თუმცა ის ჯერ არავის უნახავს და არავინ იცის, რას წარმოადგენს. ის ბოლომდე შეთანხმებულიც კი არ არის“, – დასძინა აშშ-ის პრეზიდენტმა.
დღესვე Reuters-მა გაავრცელა ცნობები იმის შესახებ, რომ ტანკერებმა ჰორმუზის სრუტის დატოვება დაიწყეს.