რუსული დრონი გვიან ღამით რუმინეთის ქალაქ გალაცში 10-სართულიან საცხოვრებელ სახლს შეეჯახა. ინფორმაციას რუმინეთის თავდაცვის სამინისტრო ავრცელებს.
აღსანიშნავია, რომ ქალაქი გალაცი უკრაინის ოდესის ოლქის იზმაილის რაიონს ესაზღვრება. სავარაუდოდ, რუსებმა დრონი უკრაინის დასაბომბად გაუშვეს, თუმცა მან კურსი შეიცვალა და რუმინეთში შეიჭრა.
„29 მაისის ღამეს რუსეთის ფედერაციამ რუმინეთის საზღვართან ახლოს განლაგებული უკრაინის ინფრასტრუქტურული და სამოქალაქო ობიექტების დაბომბვა უპილოტო საფრენი აპარატებით განაახლა. უპილოტო საფრენი აპარატი რუმინეთის საჰაერო სივრცეში შეიჭრა. მას რადარები გალაცის მუნიციპალიტეტის სამხრეთ საზღვრამდე თვალყურს ადევნებდნენ. ის საცხოვრებელი სახლის სახურავს შეეჯახა, რის შედეგადაც ხანძარი გაჩნდა“, – აღნიშნულია რუმინეთის თავდაცვის სამინისტროს მიერ გავრცელებულ განცხადებაში.
რუმინეთის საგანგებო სიტუაციების მართვის სააგენტოს ინფორმაციით, ინციდენტის შედეგად ორი ადამიანი დაშავდა. ისინი საავადმყოფოში გადაიყვანეს. კიდევ ორ ადამიანს პანიკური შეტევა დაემართა. 70 ადამიანის ევაკუაცია გახდა საჭირო.