იაპონიის თავდაცვის მინისტრმა შინჯირო კოიზუმიმ განაცხადა, რომ ჩინეთის მხრიდან ბრალდებები იაპონური მილიტარიზმის აღორძინების შესახებ თვალთმაქცურია, ვინაიდან თავად პეკინი კოლოსალურ ბირთვულ არსენალს ფლობს და აგრესიულ პოლიტიკას აწარმოებს.
სინგაპურში გამართულ აზიის თავდაცვის ფორუმზე, „შანგრი-ლას დიალოგზე“ სიტყვით გამოსვლისას, კოიზუმიმ ყურადღება გაამახვილა პეკინის რიტორიკაში არსებულ აშკარა წინააღმდეგობაზე. მან ხაზგასმით აღნიშნა, რომ ბირთვული იარაღის მქონე სახელმწიფო უსაფუძვლოდ ესხმის თავს ქვეყანას, რომელსაც ასეთი შეიარაღება არ გააჩნია.
„უცნაური არ არის, რომ ჩინეთი, რომელიც ფლობს ბირთვული იარაღისა და სტრატეგიული ბომბდამშენების უზარმაზარ არსენალს, იაპონიას, რომელსაც არცერთი მათგანი არ გააჩნია, ე.წ. „ახალ მილიტარიზმში“ ადანაშაულებს? მაგრამ ეს აბსოლუტურად არ შეესაბამება სიმართლეს“, – ხაზგასმით აღნიშნა კოიზუმიმ და დასძინა, რომ იაპონიის ძალისხმევა მიმართულია კონფლიქტის შეკავებისკენ და ხორციელდება გამჭვირვალე გზით.
იაპონელი მინისტრის მკვეთრი განცხადება იმ ფონზე გაჟღერდა, როდესაც აშშ-ის თავდაცვის მინისტრმა პიტ ჰეგსეტმა წინა დღით დადებითად შეაფასა ვაშინგტონსა და პეკინს შორის ურთიერთობების მოწესრიგება.
გასულ კვირას FT წერდა, რომ დონალდ ტრამპისა და სი ძინპინის შეხვედრაზე ყველაზე დაძაბული თემა იაპონიის რემილიტარიზაცია გახდა. ჩინეთის ლიდერი ამ საკითხზე „ემოციურად და გაღიზიანებით“ საუბრობდა.
პეკინსა და ტოკიოს შორის ურთიერთობები მკვეთრად გაუარესდა მას შემდეგ, რაც სანაე ტაკაიჩიმ 2025 წლის ნოემბერში განაცხადა, რომ ტაივანზე ჩინეთის შესაძლო თავდასხმამ შესაძლოა იაპონიის წინაშე „ეგზისტენციალური საფრთხე“ შექმნას, რაც გაამართლებდა იაპონიის შეიარაღებული ძალების გამოყენებას. ყოველწლიურ თავდაცვის მოხსენებებში იაპონია ბოლო წლებში ჩინეთის მხრიდან მომავალ საფრთხეს უფრო სერიოზულად მოიხსენიებს, ვიდრე ჩრდილოეთ კორეის მხრიდან, – აღნიშნავს FT. 2026 წლის მოხსენების პროექტში იაპონია ასევე გამოხატავს „სერიოზულ შეშფოთებას“ პეკინსა და მოსკოვს შორის სამხედრო თანამშრომლობის გაღრმავების გამო.
2026 წლის აპრილში იაპონიამ ლეტალური იარაღის ექსპორტზე შეზღუდვები გააუქმა. ამასთან, ძალაში დარჩა ექსპორტის აკრძალვა იმ ქვეყნებში, სადაც საომარი მოქმედებები მიმდინარეობს, თუმცა მთავრობამ აღნიშნა, რომ გამონაკლისი შეიძლება დაუშვას „განსაკუთრებული გარემოებების“ შემთხვევაში. FT-მა ამას იაპონიის პოლიტიკაში „ისტორიული შემობრუნება“ უწოდა.