„ქართული ოცნების“ ახალგაზრდული ორგანიზაციის რეგიონული კონფერენციები გრძელდება.
რიგით მეცხრე კონფერენცია რაჭაში, ამბროლაურში გაიმართა, რომელსაც სტუმრის სტატუსით „ქართული ოცნების“ დამფუძნებლისა და საპატიო თავმჯდომარის, ბიძინა ივანიშვილის ვაჟი, ცოტნე ივანიშვილი დაესწრო.
ახალგაზრდული ორგანიზაციის თავმჯდომარე ვარლამ ლიპარტელიანი და ბორდის წევრები ამჯერად რაჭა-ლეჩხუმისა და ქვემო სვანეთის ახალგაზრდებს შეხვდნენ და მათთვის საჭირბოროტო თემებზე ისაუბრეს. ორგანიზაციის წარმომადგენლებმა მოისმინეს მათი ხედვები და პოზიციები, მათ შორის, კრიტიკული მოსაზრებები სხვადასხვა საკითხთან დაკავშირებით.
შეხვედრაზე კიდევ ერთხელ ითქვა, რომ კონფერენციების მიზანია სხვადასხვა მიმართულებით ახალგაზრდების ჩართულობა, მათ შორის, პოლიტიკურ პროცესებში. ასევე, ხაზი გაესვა, რომ შეხვედრების ფარგლებში გაჟღერებული იდეები სამუშაო რეჟიმში გადადის და მათი განხორციელებისთვის კონკრეტული ნაბიჯების გადადგმა იგეგმება.
შეხვედრის მთავარი ნაწილი კითხვა-პასუხის რეჟიმს დაეთმო, სადაც ძირითად თემებად დასაქმება და განათლების რეფორმა დასახელდა. მონაწილეებმა იმსჯელეს ახალგაზრდების როლზე ქვეყნის, რეგიონისა და ქალაქის განვითარებაში. ასევე, მიმოიხილეს მიმდინარე პოლიტიკური საკითხები. დისკუსიისას ახალგაზრდებმა ღიად ისაუბრეს მათ წინაშე არსებულ გამოწვევებზე, მათ შორის, ახალგაზრდული ცენტრების საჭიროებაზე.
„მათი ხედვები და სამომავლო გეგმები საინტერესო და მნიშვნელოვანია ჩვენი ქვეყნის განვითარებისა და წინსვლისთვის. ახალგაზრდების ჩართულობა ძალიან მნიშვნელოვანია და მათი მოთხოვნები, სურვილები და ხედვები, აუცილებლად იქნება გათვალისწინებული ჩვენი გუნდის – ცენტრალური და ადგილობრივი ხელისუფლების მიერ“, – ვარლამ ლიპარტელიანი.
„საქართველოს ხელისუფლების ერთ-ერთ ყველაზე მნიშვნელოვან პრიორიტეტს წარმოადგენს ახალგაზრდების მხარდაჭერა და მათი ინტერესების გათვალისწინება პოლიტიკურ საქმიანობაში. მოლოდინი გვაქვს აქ მცხოვრები ახალგაზრდებისგან, რომ მათ მიერ გაჟღერებული იდეები იქნება ძალიან მნიშვნელოვანი ხელისუფლების სამომავლო საქმიანობაში გასათვალისწინებლად“, – მარიამ გრიგოლიშვილი.
„თითოეული ასეთი შეხვედრა გვაძლევს შესაძლებლობას, რომ რეგიონს შევხედოთ ადგილობრივი ახალგაზრდების თვალით. უნდა აღინიშნოს, რომ რაჭას, ლეჩხუმს, ქვემო სვანეთს მნიშვნელოვანი პოტენციალი აქვს. ჩვენი უმთავრესი მიზანია, რომ სწორედ ახალგაზრდებთან მჭიდრო კომუნიკაციით გავიგოთ, თუ ეს პოტენციალი როგორ ვაქციოთ მათ შესაძლებლობად. ჩვენ ვთვლით, ძლიერი რეგიონების საფუძველი სწორედ აქტიური და ინიციატივიანი ახალგაზრდები არიან“, – თეკლა თიკანაშვილი.
„ქართული ოცნების“ ახალგაზრდული ორგანიზაციის შეხვედრები რეგიონებში 28 მარტს დაიწყო. რაჭა-ლეჩხუმისა და ქვემო სვანეთის რეგიონის გარდა, შეხვედრები გაიმართა კახეთში, ქვემო ქართლში, შიდა ქართლში, მცხეთა-მთიანეთში, სამცხე-ჯავახეთში, გურიაში, სამეგრელო-ზემო სვანეთსა და აჭარაში.
ახალგაზრდული ორგანიზაციის შეხვედრები საქართველოს ათ რეგიონში იმართება და ორგანიზაციის წარმომადგენლები ახალგაზრდებს თითოეული მუნიციპალიტეტის ცენტრალურ ქალაქებში ხვდებიან. დასკვნით ღონისძიებას თბილისი უმასპინძლებს.
