აშშ-ის ვიცე-პრეზიდენტი, ჯეი დი ვენსი სოციალურ ქსელში ჰენრი ნოვაკის გარდაცვალებას ეხმაურება და მომხდარს დასავლური ცივილიზაციის კრიზისს უკავშირებს.
ვენსის განცხადებით, ნოვაკის სიკვდილი ტრაგიკული და აღმაშფოთებელია, მომხდარში კი იგი ევროპული ელიტების პოლიტიკას ადანაშაულებს.
„ჰენრი ნოვაკი ზუსტად ისე გარდაიცვალა, როგორც ცივილიზაცია კვდება: მიტოვებული, ხელბორკილდადებული იმ ხელისუფლების მიერ, რომელიც მას არც ენდობოდა და არც ადარდებდა, და დადანაშაულებული სიძულვილით მოტივირებულ დანაშაულებში, რომლებიც მას არ ჩაუდენია. მისი მკვლელობა იმდენადვე ტრაგიკულია, რამდენადაც აღმაშფოთებელი. ის დღეს ცოცხალი უნდა იყოს და იქნებოდა კიდეც, ევროპის ელიტის ბოლო რამდენიმე თაობას თვითგვემის პოლიტიკისა და მიგრანტთა მასობრივი ნაკადის წინააღმდეგ მტკიცე პოზიცია რომ შეენარჩუნებინა – მიგრანტების, რომელთაგან ბევრს სძულს დასავლეთი და ის ადამიანები, ვისაც ის უყვარს.
ჰენრი შორს არის იმისგან, რომ იყოს პირველი, ვინც ასე უაზროდ დაკარგა სიცოცხლე, და ვშიშობ, ის არც უკანასკნელი იქნება. ყოველ ჯერზე, როდესაც მისნაირი სიცოცხლე იკარგება, ერთადერთი სწორი რეაქცია სამართლიანი რისხვაა. ერთ-ერთი ყველაზე მნიშვნელოვანი რამ, რაც ტრამპის ადმინისტრაციამ მსოფლიოს დაუმტკიცა, არის ის, რომ მასობრივი მიგრაციის ნაკადის შეჩერება და ეროვნული სუვერენიტეტის დაცვა პოლიტიკური ნებისა და ლიდერობის საკითხია. ყველაფერი დანარჩენი მხოლოდ თავის მართლებაა.
სწორედ იმიტომ, რომ გვიყვარს დასავლეთი, გვსურს მისი შენარჩუნება. ჩვენ გვიყვარს ჩვენი ცივილიზაცია. გვიყვარს ჩვენი ქვეყანა. გვიყვარს ჩვენი შვილები. და არავინ, საერთოდ არავინ, არასოდეს უნდა კვდებოდეს ისე, როგორც ჰენრი ნოვაკი გარდაიცვალა. ღმერთმა ნუგეში მისცეს მათ, ვისაც ის უყვარდა, და ღმერთმა გაანათლოს მისი სული“, – აღნიშნა აშშ-ის ვიცე-პრეზიდენტმა.
ჰენრი ნოვაკი 2025 წლის 4 დეკემბერს საუთჰემპტონში მოკლეს. მას 23 წლის მამაკაცმა დანით რამდენიმე სასიკვდილო ჭრილობა მიაყენა. ადგილზე მოსულმა პოლიციამ ჩათვალა, რომ ინციდენტში დამნაშავე ნოვაკი იყო და ჯერ კიდევ ცოცხალ ადამიანს ბორკილები დაადო. დაჭრილი ნოვაკი პოლიციელებს ეუბნებოდა, რომ ვეღარ სუნთქავდა, თუმცა სამართალდამცველებმა მას არ დაუჯერეს. მოზარდი ძლიერი სისხლდენის შედეგად გარდაიცვალა.