აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე სოხუმის გიორგი რატიანის სახელობის მოზარდ მაყურებელთა პროფესიული თეატრის ახალი სპექტაკლის „მე არსად წავსულვარ“ პრემიერას დაესწრო.
აფხაზეთის ავტონომიური რესპუბლიკის მთავრობის ინფორმაციით, სპექტაკლი აფხაზეთის თემატიკას ეხმიანება და გადმოსცემს იმ თაობის სევდასა და განცდებს, რომელსაც აფხაზეთი არასდროს უნახავს, თუმცა ის მათი გენეტიკური მეხსიერების განუყოფელი ნაწილია. დადგმა კიდევ ერთხელ უსვამს ხაზს შერიგებისა და დაკარგული კავშირის აღდგენის მნიშვნელობასა და აუცილებლობას.
ემოციებით, მოგონებებით, ადამიანური ურთიერთობებითა და რეალურ ფაქტებზე დაფუძნებულმა წარმოდგენამ სოხუმის კონსტანტინე გამსახურდიას სახელობის პროფესიულ სახელმწიფო დრამატულ თეატრში შეკრებილი მაყურებლის მოწონება დაიმსახურა.
პრემიერას ასევე, ესწრებოდნენ აფხაზეთის ა/რ განათლებისა და კულტურის მინისტრი გიორგი ძაძამია, აფხაზეთის ა/რ ჯანმრთელობისა და სოციალური დაცვის მინისტრი ბესიკ კუსიდი, აფხაზეთის უმაღლესი საბჭოს თავმჯდომარე ჯემალ გამახარია, აფხაზეთის მთავრობისა და უმაღლესი საბჭოს წევრები, სახელოვნებო სფეროს წარმომადგენლები და სხვა მოწვეული სტუმრები.
