ჩრდილოეთ აფრიკაში მდებარე სეუტა და მელილია ესპანეთს ეკუთვნის და ეს საკითხი განხილვას არ ექვემდებარება, – განაცხადეს ესპანელმა ოფიციალურმა პირებმა მას შემდეგ, რაც მაროკოს იუსტიციის მინისტრმა ამ ქალაქებზე მაროკოს ტერიტორიული პრეტენზია კიდევ ერთხელ დააფიქსირა. ინფორმაციას „როიტერი“ ავრცელებს.
„სეუტა და მელილია მხოლოდ ესპანური კი არა, უკიდურესად ესპანურია და მათ ვერავინ შეეხება“, – განაცხადა ესპანეთის თავდაცვის მინისტრმა, მარგარიტა რობლესმა.
ამ კომენტარს წინ უძღოდა მაროკოს იუსტიციის მინისტრის, აბდელატიფ უაჰბის განცხადება, რომ მაროკო ესპანეთთან მოლაპარაკებების დროს ყოველთვის აყენებდა სეუტისა და მელილიას სტატუსის საკითხს და გრძელვადიან პერსპექტივაში მის დიალოგის გზით გადაწყვეტას ისახავს მიზნად.
ცალკე განცხადებაში ესპანეთის საგარეო საქმეთა სამინისტრომ აღნიშნა, რომ ქვეყნის ტერიტორიული მთლიანობის საკითხი „არ განხილულა და არასოდეს განიხილება არავისთან“.
ცნობისთვის, ივლისის ბოლოს სეუტაში სასაზღვრო კრიზისი განვითარდა, რომლის დროსაც, სავარაუდოდ, 72 000-მდე მიგრანტმა გადაკვეთა ანკლავის საზღვარი. მასობრივი გადასვლის შედეგად, სულ მცირე, 96 ადამიანი დაიღუპა. „როიტერის“ ცნობით, 1956 წელს დამოუკიდებლობის მოპოვების შემდეგ მაროკო სეუტასა და მელილიას ესპანეთის მიერ ოკუპირებულ ტერიტორიებად მიიჩნევს და აცხადებს, რომ მათზე სუვერენიტეტი საბოლოოდ მაროკოს უნდა გადაეცეს. ესპანეთი კი ორივე ქალაქს თავისი ტერიტორიის განუყოფელ ნაწილად მიიჩნევს, სეუტას – მე-17, ხოლო მელილიას მე-15 საუკუნიდან.