ხუთშაბათს პერუს სამხრეთით, აიაკუჩოს რეგიონში 7.2 მაგნიტუდის სიმძლავრის მიწისძვრა დაფიქსირდა. ამის შესახებ ინფორმაციას პერუს გეოფიზიკური ინსტიტუტი (IGP) ავრცელებს. ეპიცენტრი ქალაქ კორაკორადან 35 კილომეტრში მდებარეობდა. ამ ეტაპზე მსხვერპლის ან სერიოზული ნგრევის შესახებ ოფიციალური ცნობები არ გავრცელებულა.
IGP-ის ცნობით, მიწისძვრა ადგილობრივი დროით 13:00 საათზე მოხდა, ხოლო მისი კერა 108 კილომეტრის სიღრმეში მდებარეობდა. ბიძგები მსუბუქად იგრძნობოდა დედაქალაქ ლიმაშიც, რომელიც ეპიცენტრიდან დაახლოებით 650 კილომეტრის დაშორებით მდებარეობს.
რეგიონულმა საგანგებო სიტუაციების ოპერატიულმა ცენტრმა (COEN) მიწისძვრის მახასიათებლები დაადასტურა, თუმცა ზიანის შესახებ დეტალური ინფორმაცია ჯერ არ გავრცელებულა. ადგილობრივი მედია აიაკუჩოს რეგიონში კლდეების ჩამოშლასა და რამდენიმე საცხოვრებელი სახლის დაზიანებაზე იუწყება.
IGP-ის ხელმძღვანელმა, ერნანდო ტავერამ განაცხადა, რომ „ამ ეტაპზე კრიტიკული არაფერი მომხდარა“, თუმცა ვითარების შეფასება კვლავ გრძელდება.
პერუ წყნარი ოკეანის „ცეცხლოვან რგოლში“ მდებარეობს – ზონაში, სადაც მსოფლიოში სეისმური აქტივობის 80% ფიქსირდება.