ბრიტანეთის გადაწყვეტილება, უკრაინისთვის გადაეცა საიდუმლო ინფორმაცია ბრიტანული წარმოების კომპონენტების შესახებ, რომლებიც SCALP-ის ტიპის შორ მანძილზე მოქმედი ფრთოსანი რაკეტების დასამზადებლად გამოიყენება, „ცეცხლზე ნავთის დასხმას“ ნიშნავს,- ამის შესახებ კრემლის პრესსპიკერმა, დიმიტრი პესკოვმა განაცხადა და ეს გადაწყვეტილება უკიდურესად უარყოფითად შეაფასა.
დიდი ბრიტანეთის ახალი პრემიერ-მინისტრი ენდი ბერნემი კიევში ჩავიდა. ეს მისი პირველი უცხოური ვიზიტია თანამდებობის დაკავების შემდეგ. მოსალოდნელი იყო, რომ ის ბრიტანეთის მხარდაჭერას გამოაცხადებდა, რომელიც კიევს შორ მანძილზე მოქმედი რაკეტების ადგილობრივი წარმოების გაუმჯობესებაში დაეხმარება.
ვიზიტისა და აღნიშნული მხარდაჭერის შესახებ კითხვაზე პასუხისას, კრემლის პრესსპიკერმა ბრიტანეთი დაადანაშაულა იმაში, რომ ის ყველაფერს აკეთებს, რათა საბოლოო სამშვიდობო შეთანხმებისკენ მიმავალი ნებისმიერი პროგრესი შეაფერხოს.
„დიდი ბრიტანეთი ამ ომში კიევის რეჟიმის მხარეს არის ჩართული. ბრიტანეთი სისტემატურად და რეგულარულად ასხამს ცეცხლზე ნავთს და ასევე სისტემატურად და რეგულარულად აწყობს სქემებს, რათა სამშვიდობო მოგვარების პროცესში უმცირესი წინსვლაც კი აღკვეთოს“, – განაცხადა პესკოვმა.
მისივე თქმით, რუსეთის სამხედრო ძალები უკვე სისტემატურად აგროვებენ ინფორმაციას სარაკეტო წარმოების ნებისმიერი ობიექტის ადგილმდებარეობის დასადგენად და მათ გასანადგურებლად.
გასულ კვირას მოსკოვმა ლონდონი გააფრთხილა გაურკვეველი „შედეგების“ შესახებ, თუ ბრიტანეთი კიევს დრონებს მიაწვდიდა. რუსეთმა ბრიტანეთი ომში ჩართულობის გაღრმავებაში დაადანაშაულა მას შემდეგ, რაც გავრცელდა ინფორმაცია, რომ ბრიტანული წარმოების დრონები პირველად გამოიყენეს რუსეთის წინააღმდეგ შორი მოქმედების დარტყმებისთვის. ბერნემმა მაშინ განაცხადა, რომ ლონდონი 100%-ით ერთგულია უკრაინის და მხარს უჭერს კიევს „უკანონო ომის წინააღმდეგ“ ბრძოლაში.