ტრამპის ადმინისტრაცია 200 000-მდე იმ უცხოელისთვის ბიზნეს და ტურისტული ვიზების გაუქმებას გეგმავს, რომლებმაც შეერთებულ შტატებში თავშესაფარი მოითხოვეს ან ამჟამად ითხოვენ. ინფორმაციას ამის შესახებ NBC News-ი ავრცელებს.
განხორციელების შემთხვევაში, ეს ნაბიჯი აშშ-ის ისტორიაში ვიზების ყველაზე მასშტაბური ერთჯერადი გაუქმება იქნება და, სავარაუდოდ, სამართლებრივ გამოწვევებს წააწყდება.
თუ გადაწყვეტილება არ გასაჩივრდა ან არ გადაიხედა, მოსალოდნელია, რომ სახელმწიფო დეპარტამენტი უახლოეს კვირებში გამოაცხადებს 2016-დან 2026 წლამდე გაცემული B1 და B2 ვიზების გაუქმების შესახებ იმ პირებისთვის, რომლებმაც თავშესაფარი მოითხოვეს ან ახლა ითხოვენ.
„ჩვენ კოორდინაციაში ვართ შიდა უსაფრთხოების დეპარტამენტთან, რათა გამოვავლინოთ და გავაუქმოთ იმ უცხოელთა არასაიმიგრაციო ვიზები, რომლებიც შეერთებულ შტატებში მოკლევადიანი ვიზიტორის სტატუსით ჩამოვიდნენ, ხოლო შემდეგ, აქ მუდმივად დარჩენის მიზნით, თავშესაფარი მოითხოვეს“, – განაცხადა სახელმწიფო დეპარტამენტის სპიკერმა, ტომი პიგოტმა.
უწყების წარმომადგენელმა კონკრეტული ციფრების დასახელებისგან თავი შეიკავა და აღნიშნა, რომ პროცესი უწყვეტ რეჟიმში წარიმართება, შესაბამისად, გაუქმებული ვიზების საბოლოო რაოდენობა დინამიური იქნება.