აგვისტოდან რუსეთის მოქალაქეობაზე უარის თქმა გაძვირდა. ესტონეთის შინაგან საქმეთა მინისტრის, იგორ ტაროს განცხადებით, ჯერჯერობით რთული შესაფასებელია, ფასის ზრდა განმცხადებელთა რაოდენობის კლებას გამოიწვევს თუ არა.
რუსეთის ყოფილმა მოქალაქემ, ანდრეი მალაშკინმა ესტონეთის მოქალაქეობის მიღების პროცესი 2022 წელს დაიწყო. მისი თქმით, სრულმა პროცედურამ თითქმის სამწელიწად-ნახევარი წაიღო და მხოლოდ გასულ წელს დასრულდა.
„როდესაც ომი დაიწყო, მივხვდი, რომ რუსეთის მოქალაქეობა ჩემთვის ხელსაყრელი აღარ იყო“, – აღნიშნა მალაშკინმა.
მალაშკინის განმარტებით, ყველაზე დიდი დრო სწორედ რუსეთის მოქალაქეობაზე უარის თქმამ წაიღო.
„მახსოვს, რუსეთის საკონსულოს რიგში დაახლოებით ოთხი თვე ვიდექი. როდესაც იქ მივედი, აღმოჩნდა, რომ ზოგიერთ დოკუმენტს ვადა გაუვიდა. შესაბამისად, რიგში ხელახლა ჩადგომა მომიწია, რასაც კიდევ დაახლოებით სამი თვე დასჭირდა“, – იხსენებს მალაშკინი.
იმ პერიოდში რუსეთის მოქალაქეობაზე უარის თქმა მას 300 ევროზე ოდნავ მეტი დაუჯდა. მიმდინარე წლის აგვისტოდან კი ესტონეთში იგივე პროცედურის ღირებულება 2 376 ევროს შეადგენს.
„ამის შესახებ მსმენია, თუმცა არ მჯეროდა, რომ სიმართლე იყო. შეუძლებელია, ადამიანებმა ერთ დოკუმენტში ამხელა თანხა გადაიხადონ“, – აღნიშნა მალაშკინმა.
იგორ ტაროს განცხადებით, ფასის ზრდა რუსეთში შექმნილ რთულ ვითარებას უკავშირდება.
„ვფიქრობ, უცხოეთში საკუთარი დიპლომატიური მისიების შესანახად რუსეთს ფინანსები აღარ ჰყოფნის. მეორე მხრივ, სავარაუდოდ, მოქალაქეობაზე უარის მთქმელთა რაოდენობა გაიზარდა და მათ სათანადოდ მოსამსახურებლად საკმარისი პერსონალი არ ჰყავთ. ადამიანის უფლებათა საყოველთაო დეკლარაციის თანახმად, მოქალაქეობაზე უარის თქმის აღსაკვეთად ზომების მიღება არავის შეუძლია. ამ ზოგადი პრინციპიდან გამომდინარე, რუსეთი დეკლარაციას გარკვეულწილად არღვევს“, – განმარტა ტარომ.
ტაროს თქმით, ჯერ კიდევ ნაადრევია იმის შეფასება, მაღალი მოსაკრებელი განმცხადებელთა რაოდენობას შეამცირებს თუ არა.
„სამწუხაროდ, როდესაც საქმე რუსეთის სახელმწიფო მოსაკრებელს ეხება, ესტონეთის სახელმწიფოს არაფრის შეცვლა არ შეუძლია. თანხა ნამდვილად დიდია, თუმცა თუ ვინმეს მოქალაქეობაზე უარის თქმა მართლა მტკიცედ აქვს გადაწყვეტილი, ვფიქრობ, ამ ფულს იშოვის“, – დასძინა ტარომ.
ბოლო წლებში რუსეთის მოქალაქეების მხრიდან ესტონეთის მოქალაქეობის მიღების მიმართ ინტერესი მაღალი რჩება. გასულ წელს პოლიციისა და საზღვრის დაცვის დეპარტამენტში სულ 465 განცხადება შევიდა. მიმდინარე წლის ივლისის მდგომარეობით კი უწყებამ 217 განცხადება მიიღო.