რუსეთმა 8 სექტემბრის ღამეს კიევის მიმართულებით ბალისტიკური რაკეტები და რეაქტიული დრონები გაუშვა. თავდასხმის შედეგად ორი ადამიანი დაიღუპა, შვიდი კი დაშავდა, მათგან სამი საავადმყოფოში გადაიყვანეს, იუწყება უკრაინული მედია.
მედიის ცნობით, იერიშებმა და დაბომბვით გამოწვეულმა ხანძრებმა საცხოვრებელი შენობები და საგანმანათლებლო დაწესებულება დააზიანა.
თავდასხმა აშშ-ის პრეზიდენტის დონალდ ტრამპის სპეციალური წარმომადგენლების სტივ უიტკოფისა და ჯარედ კუშნერის კიევში ვიზიტის პერიოდში რუსეთისა და უკრაინის დედაქალაქებზე საჰაერო იერიშების დროებითი შეჩერების დასრულებას მოჰყვა.
კიევის საქალაქო სამხედრო ადმინისტრაციის ინფორმაციით, თავდასხმას ორი ადამიანი ემსხვერპლა, შვიდი კი დაშავდა. კიევის მერმა ვიტალი კლიჩკომ განაცხადა, რომ სამი დაშავებული საავადმყოფოში გადაიყვანეს.
დედაქალაქში სულ მცირე ორი მრავალსართულიანი საცხოვრებელი კორპუსი დაზიანდა. ხანძარი გაჩნდა საწყობებში, დაზიანდა ავტოფარეხები და ავტომობილები.
უკრაინის საგანგებო სიტუაციების სახელმწიფო სამსახურის ინფორმაციით, მაშველებმა თავდასხმის შედეგად დაზიანებული 16-სართულიანი საცხოვრებელი კორპუსიდან ორი ადამიანი გამოიყვანეს. კიდევ 10 ადამიანის ევაკუაცია გახდა საჭირო, რომლებიც ხუთსართულიან შენობაში იყვნენ ჩარჩენილნი.
კლიჩკოს განცხადებით, თავდასხმის შედეგად კიევში ერთ-ერთ საგანმანათლებლო დაწესებულებას ცეცხლი გაუჩნდა.