საქართველოს პარლამენტის წევრები – ფრაქცია „ხალხის ძალის“ თავმჯდომარე დიმიტრი ხუნდაძე და ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის მოადგილე ზურაბ ქადაგიძე – სურამში დემობანაკის მონაწილეებს შეხვდნენ.
დემობანაკი, რომლის ავტორია „ხალხის ძალის“ წევრი თამარ ჩიბურდანიძე, ქალაქ თბილისის მერიის მხარდაჭერითა და დემოგრაფიული აღორძინების ფონდის ორგანიზებით საქართველოში პირველად განხორციელდა. პროექტი მიზნად ისახავს ახალგაზრდებისთვის დემოგრაფიული ცოდნის გაღრმავებას.
ბანაკის ერთკვირიანი პროგრამა დატვირთული იყო ტრენინგებით, ვორკშოპებითა და სიმულაციური თამაშებით. ახალგაზრდები გაეცნენ მსოფლიოსა და საქართველოს მოსახლეობის დემოგრაფიულ ისტორიას, განვითარების პერსპექტივებს, ქრისტიანობის როლს ეროვნულ იდენტობაში, ასევე ოჯახის ინსტიტუტისა და ტრადიციული ღირებულებების მნიშვნელობას დემოგრაფიული პრობლემების გადაჭრაში.
დიმიტრი ხუნდაძემ ახალგაზრდებს საქართველოს დემოგრაფიული ვითარების შესახებ ამომწურავი ინფორმაცია მიაწოდა. მან ისაუბრა დემოგრაფიული პრობლემების წარმოქმნის მიზეზებსა და მათი მოგვარების გზებზე, ასევე ნარკოპოლიტიკაზე, აბორტზე, ქორწინებაზე, მიგრაციასა და სხვა აქტუალურ საკითხებზე.
საქართველოს პარლამენტის წევრი ზურაბ ქადაგიძე დემობანაკის მონაწილეებს დემოგრაფიული პრობლემების მოგვარებაში ახალგაზრდული პოლიტიკის როლზე ესაუბრა. მან ახალგაზრდებს გააცნო სახელმწიფოს ახალგაზრდული პოლიტიკა, რომელიც ქვეყნისთვის პრიორიტეტულია, და ბანაკის მონაწილეებს თემატური სიმულაციური თამაშები ჩაუტარა.
ახალგაზრდები აქტიურად ჩაერთნენ დიალოგში, დისკუსიასა და სიმულაციურ თამაშებში. შეხვედრის ბოლოს, მონაწილეთა თხოვნით, სტუმრებმა დემობანაკის დიდ ბანერზე საკუთარი სურვილები დატოვეს.