მილანის მალპენზას საერთაშორისო აეროპორტს იტალიის ყოფილი პრემიერ-მინისტრის, ბიზნესმენის სილვიო ბერლუსკონის სახელი მიენიჭა. ინფორმაციას იტალიური მედია ავრცელებს.
„ის ფაქტი, რომ მილანის მალპენზას აეროპორტი, რომელსაც სილვიო ბერლუსკონის სახელი მიენიჭა, ყოველდღიურად მთელი მსოფლიოდან ჩამოსულ ათასობით მგზავრს მიიღებს, სიამაყითა და ემოციით მავსებს“, – განაცხადა იტალიის ყოფილი პრემიერის ქალიშვილმა მარინა ბერლუსკონიმ სახელის მინიჭების ცერემონიაზე.
მისივე თქმით, აეროპორტი ერთგვარი ხიდია იტალიასა და მსოფლიოს შორის და „რა უკეთესი სახელი შეიძლება ჰქონდეს ასეთ ხიდს, თუ არა სილვიო ბერლუსკონის?“.
აეროპორტისთვის სახელის მინიჭებამ დაპირისპირება გამოიწვია იტალიის ვიცე-პრემიერს, ტრანსპორტის მინისტრს მატეო სალვინისა და მილანის მერს ჯუზეპე სალას შორის, იუწყება მედია.
„ეს პოლიტიკური დღე არ არის. ჩვენ ბერლუსკონის, როგორც ერთ-ერთ უდიდეს იტალიელ მეწარმეს ვიხსენებთ“, – განაცხადა სალვინიმ აეროპორტის ტერმინალ-1 მიმდებარედ ბერლუსკონის მემორიალური დაფის გახსნის ცერემონიაზე.