“ჩვენ მოქალაქეებს ახსენდებათ ის კრიტიკული განცხადებები, რასაც ევროპელი პოლიტიკოსები საქართველოში მიმდინარე ძალადობრივ აქციებზე აკეთებდნენ”

როდესაც ძალადობრივი აქციები მიმდინარეობს, სახელმწიფოს უწევს კონკრეტული ძალის გამოყენება. სწორედ ამ ძალის გამოყენებას ვხედავთ, – აცხადებს პარლამენტის თავმჯდომარის მოადგილე ნინო წილოსანი.

დეპუტატმა კომენტარი გააკეთა საფრანგეთში მიმდინარე პროცესებთან დაკავშირებით.

„უზომოდ სამწუხაროა, რასაც ვუყურებთ ევროპის დედაქალაქების ქუჩებში და რა თქმა უნდა, ვუსურვებთ ფრანგ ხალხს მშვიდობას, თუმცა, ალბათ ჩვენ ნებისმიერ მოქალაქეს ახსენდება ის კრიტიკული განცხადებები, რასაც ევროპელი ლიდერები, პოლიტიკოსები საქართველოში მიმდინარე ძალადობრივ აქციებზე აკეთებდნენ. არანაირი ნიშნის მოგება – ჩვენი პოლიტიკური კულტურა არ მოგვცემს უფლებას, რომ ვინმეს ნიშნის მოგებით ვესაუბროთ, თუმცა ფაქტია, როდესაც ძალადობრივი აქციები მიმდინარეობს სახელმწიფოს უწევს კონკრეტული ძალის გამოყენება. სწორედ ამ ძალის გამოყენებას ვხედავთ“, – აცხადებს ნინო წილოსანი.