აშშ-ის გამოძიების ფედერალურმა ბიურომ სავაჭრო ცენტრში მასობრივი მკვლელობის დაგეგმვისთვის 18 წლის მამაკაცი დააკავა. ამის შესახებ „როიტერი“ წერს.
გამოცემის ცნობით, მამაკაცს მინესოტაში, მინეაპოლისთან მდებარე Mall of America-ში მასობრივი მკვლელობა ჰქონდა დაგეგმილი.
სასამართლოს დოკუმენტების თანახმად, მამაკაცი თავდასხმის განხორციელებას „ისლამური სახელმწიფოს“ სახელით გეგმავდა.
შეიხდუნ აბდულაჰ მოჰამუდი მას შემდეგ დააკავეს, რაც აშშ-ის გამოძიების ფედერალური ბიუროს ფარულმა აგენტმა მას 600 დოლარად AK-47-ის ტიპის ავტომატი, საბრძოლო მასალა და მჭიდები მიჰყიდა. მოჰამუდმა აგენტს უთხრა, რომ ოქტომბრის ბოლოს სავაჭრო ცენტრში გამართულ ღონისძიებაზე 30-დან 60-მდე ადამიანის მოკვლას გეგმავდა. მისი თქმით, სავაჭრო ცენტრის მფლობელები ებრაელები იყვნენ და ამიტომ მათი დახოცვა სურდა.
აშშ-ის გამოძიების ფედერალური ბიუროს ცნობით, მოჰამუდი თავდასხმას 24 ოქტომბერს გეგმავდა.
Mall of America შეერთებული შტატების უდიდესი სავაჭრო ცენტრია. კომპლექსში თემატური პარკი, აკვარიუმი და 500-ზე მეტი მაღაზიაა.