აშშ-ის იუსტიციის დეპარტამენტმა ნიკოლას მადუროსა და მის მეუღლეს, სილია ფლორესს ახალი ბრალდებები წაუყენა. პროკურატურა მათ ოპოზიციის ჩახშობისა და ხელისუფლების შენარჩუნების მიზნით დაკავებულების, მათ შორის ამერიკის მოქალაქეების, წამებაში ადანაშაულებს.
მადუროსა და ფლორესს, რომლებიც იანვარში ჩატარებული სპეცოპერაციის შედეგად დააკავეს, მანჰეტენის სასამართლოში ბრალი უკვე ჰქონდათ წარდგენილი ნარკოტერორიზმსა და ნარკოტიკებით ვაჭრობაში. სასამართლო პროცესი 2027 წლის ივნისშია დაგეგმილი.
ახალი ბრალდება კი უშუალოდ პოლიტიკურ რეპრესიებსა და ადამიანის უფლებების მძიმე დარღვევებს ეხება. პროკურორების განცხადებით, წყვილი დისიდენტების დევნისა და დემოკრატიის შელახვის მიზნით სასტიკ მეთოდებს მიმართავდა. ბრალდების მიხედვით, დაკავებულთა წამება მოიცავდა ელექტროშოკით წამებას, გაუპატიურებას, ხანგრძლივ იზოლაციასა და შიმშილს.
„საბრალდებო დასკვნაში აღწერილი ქმედებები ნამდვილად წარმოუდგენელია“, – განაცხადა ნიუ-იორკის სამხრეთ ოლქის პროკურორმა, ჯემი მაკდონალდმა.
მადუროს ადვოკატმა, ბარი პოლაკმა გავრცელებულ განცხადებაში აღნიშნა, რომ „პრეზიდენტი მადურო უარყოფს ახალი საბრალდებო დასკვნით წარდგენილ ბრალდებებს და სასამართლო პროცესს ელოდება“.