24-25 ოქტომბრის აქციებისას საფრანგეთში დაკავებულ პირთა რაოდენობა 1 314-მდე გაიზარდა. ინფორმაციას „ფრანს 24“ საფრანგეთის შინაგან საქმეთა სამინისტროზე დაყრდნობით წერს.
ოფიციალური უწყების ცნობით, აქციებისას დემონსტანტებსა და სამართალდამცავებს შორის შეტაკებებისას 53 ოფიცერი დაშავდა. ამასთან, როგორც ცნობილია, 24-25 ოქტომბრის აქციების მიმდინარეობისას პროტესტის მონაწილეებმა სულ 24 მაღაზია გაძარცვეს, ხოლო პოლიციამ საპროტესტო აქციების დროს გაჩენილ 75 ხანძარზე რეაგირება მოახერხა.
გამოცემა AFP ტულუზას პრეფექტურაზე დაყრდნობით წერს, რომ აქციისას 20 წლის ახალგაზრდა ხელზე მძიმედ დაიჭრა. ერთ-ერთმა პირმა კი მედიასთან განაცხადა, რომ დაშავებულს მარჯვენა ხელის რამდენიმე თითზე განსაკუთრებული ზიანი მიადგა.
მედიის ცნობით, ქალაქ პუატეიში კი ერთ-ერთ მომიტინგეს მარცხენა თვალი აქვს დაშავებული.
ცნობისთვის, 24-25 ოქტომბრის ღამეს საფრანგეთის რამდენიმე ქალაქში მასშტაბური აქციები გაიმართა, რა დროსაც მომიტინგეებსა და სამართალდამცავებს შორის დაპირისპირება მოხდა.