ჩვენი, როგორც სახელმწიფოს წარმომადგენლის, ვალდებულებაა, ჩავერთოთ და მონაწილეობა მივიღოთ პროცედურებში, რასაც ითვალისწინებს სტრასბურგის სასამართლო, ჩვენ ყოველთვის მზად ვართ, დავიცვათ სახელმწიფო, – ამის შესახებ საქართველოს იუსტიციის მინისტრმა, პაატა სალიამ განაცხადა.
სალიას კითხვა დაუსვეს განცხადებებთან და გზავნილებთან დაკავშირებით, მათ შორის ალან ბერსეს განცხადებაზე, რომ პარტიების აკრძალვის სარჩელი წავა ევროსასამართლოში. პაატა სალიას თქმით, ყველამ უნდა გაიაზროს თავისი ფუნქცია და მოვალეობა.
„ალან ბერსე არ არის მოსამართლე. პირველ რიგში, ყველამ უნდა იცოდეს და გაიაზროს თავისი ფუნქცია, მოვალეობა და პასუხისმგებლობა. მე არ მომისმენია ალან ბერსეს განცხადება, მაგრამ არა მგონია, ალან ბერსე ჩარეულიყო ასე პირდაპირ სასამართლო პროცედურებში“, – აღნიშნა სალიამ.
ბერსეს განცხადების იმ ნაწილთან დაკავშირებით, რომლის თანახმად, „იკვეთება სასამართლოს საჭიროების ნიშნები“, პაატა სალიამ განაცხადა, რომ ეს მოპასუხე მხარის უფლებაა, მიმართოს ევროპულ სასამართლოს.
„„იკვეთება ნიშნები ევროპის სასამართლოს საჭიროების“ – ეს მხარემ უნდა გადაწყვიტოს, როცა იქნება გადაწყვეტილება და იმის მიხედვით. მოპასუხე მხარემ საკონსტიტუციო განხილვის ფარგლებში დააფიქსირეს პოზიცია, რომ აპირებენ, მიმართონ ადამიანის უფლებათა ევროპულ სასამართლოს, ეს მათი უფლებაა. რა რეაგირება ექნება ამაზე სახელმწიფოს, ესეც გამოჩნდება იმის მიხედვით, რა შედეგი დადგება საქმეზე, რა იქნება სარჩელის შინაარსი და იუსტიციის სამინისტრო ამ შემთხვევაში, არა მარტო ამ შემთხვევაში, იუსტიციის სამინისტრო არის სახელმწიფოს წარმომადგენელი საერთაშორისო არბიტრაჟებში და სასამართლოებში, მათ შორის სტრასბურგის სასამართლოში“, – განაცხადა სალიამ.
კითხვაზე, მზად არის თუ არა, დაიცვას ეს სარჩელი ევროსასამართლოში, პაატა სალიამ აღნიშნა, რომ იუსტიციის სამინისტრო ყოველთვის მზადაა, დაიცვას სახელმწიფო.
„ჯერ სარჩელი დაიწეროს, მერე მიიღოს სასამართლომ. მერე ჩვენი ვალდებულებაა, როგორც სახელმწიფოს წარმომადგენლის, ჩავერთოთ და შეპასუხება გავაგზავნოთ და იმ პროცედურებში მივიღოთ მონაწილეობა, რასაც ითვალისწინებს სტრასბურგის სასამართლო. ჩვენ ყოველთვის მზად ვართ, დავიცვათ სახელმწიფო“, – აღნიშნა სალიამ.