სამწუხაროდ, რიგმა საერთაშორისო ორგანიზაციებმა ის ფუნქცია მთლიანად დაკარგეს, რაც თავის დროზე მათი დაარსებისთვის იყო მინიჭებული, რომ ობიექტური და დამოუკიდებელი შემფასებლები ყოფილიყვნენ, – ამის შესახებ პარლამენტის თვითმმართველობის კომიტეტის თავმჯდომარემ, ირაკლი ქადაგიშვილმა განაცხადა.
მისი თქმით, მსგავსი ორგანიზაციები თვითდისკრედიტაციის რეჟიმში არიან გადასულები, როდესაც იყენებენ და თავად გადაქცეული არიან კონკრეტული პოლიტიკური ბრძოლის იარაღად.
„აქედან გამომდინარეა, რომ ბიძინა ივანიშვილი ჰყავთ შეყვანილი სიაში, როგორც მედიის მიმტაცებელი. მათთვის გამაღიზიანებელი აღმოჩნდა ის ფაქტორი, რომ 2011 წელს, როდესაც ბიძინა ივანიშვილი პოლიტიკაში დაბრუნდა, საქართველოში ეროვნულ დონეზე არც ერთი მაუწყებელი ტელევიზია არ არსებობდა, რომელიც „ნაციონალური მოძრაობის“ მმართველობის ქვეშ არ იყო. სლოგანი გვახსოვს, „ახალი ამბები კეთდება აქ“. მაშინ, ბიძინა ივანიშვილმა დამოუკიდებელი ტელევიზიის შექმნა დაიწყო და „დემოკრატიის შუქურისათვის“ სანაქებო ხელისუფლებას უხერხული ალტერნატივა შეუქმნა. შემდეგ, როდესაც ბიძინა ივანიშვილი ხელისუფლებაში მოვიდა, მის მიერვე შექმნილი ტელევიზია და „ინფო 9“ გააუქმა. ჩვენ დავინახეთ, როგორ დაიწყო ბრუტალურად მიტაცებული ტელევიზიების დაბრუნების პროცესი. როგორ დაუბრუნდა „იმედი“ თავის კანონიერ მფლობელებს და ასევე „რუსთავი 2“, – განაცხადა ირაკლი ქადაგიშვილმა.
მისი თქმით, საქართველოში ევროპისთვისაც შესაშური ტელევიზიების დაფუძნება-რეგისტრაციის სისტემაა, როდესაც არანაირი სამთავრობო ნებართვა არ არის საჭირო, რომ ტელევიზია დააფუძნო.
„ვხედავთ იმასაც, რომ საქართველოში მედიის მრავალფეროვნებაა. საქართველოში ოპოზიციურ მედიას შეუძლია, არა მარტო კრიტიკული გადაცემები აკეთოს, არამედ ჯერ ყოვლად დაუსაბუთებელი და ცილისმწამებლური განცხადებებიც აკეთოს. არცერთი მედიის თანამშრომელი სასჯელს არ იხდის ჟურნალისტური ან სარედაქციო პოლიტიკის გამო. ასეთი შემთხვევა არ არსებობს. ვინმე თუ პასუხისმგებლობაშია მიცემული, სხვა საქმესთან დაკავშირებით, რომელსაც არანაირი კავშირი არ აქვს ჟურნალისტურ ან სარედაქციო საქმიანობასთან. ქართველი ხალხი ხედავს, რამდენად თვითდისკრედიტაციის, თვითლიკვიდაციის, თვითმორალური დაკნინების პოზიციაში არიან ის ორგანიზაციები, რომლებიც მხოლოდ შეკვეთილი კვლევების თუ შეკვეთილი ბანერების გამოცხობით არიან დაკავებულები. ზოგადად, ეს დემოკრატიის ფასეულობას ეროზიას უკეთებს, რაც მათივე საქმიანობის დამსახურებაა და იმის, რომ დღეს საქართველოში მედია პლურალიზმი არსებობს“, – განაცხადა ირაკლი ქადაგიშვილმა.
ცნობისთვის, ორგანიზაციამ „რეპორტიორები საზღვრებს გარეშე“ გამოაქვეყნა 2026 წლის „პრესის თავისუფლების მტაცებლების“ სია, რომელშიც ბიძინა ივანიშვილიც შეიყვანა. სიაში არიან აშშ-ის პრეზიდენტი დონალდ ტრამპი, ისრაელის პრემიერ-მინისტრი ბენიამინ ნეთანიაჰუ, თურქეთის პრეზიდენტი რეჯეფ თაიფ ერდოღანი, აზერბაიჯანის პრეზიდენტი ილჰამ ალიევი, რუსეთის პრეზიდენტი ვლადიმერ პუტინი, ბელარუსის პრეზიდენტი ალექსანდრე ლუკაშენკო, ყაზახეთის პრეზიდენტი ყასიმ-ჟომართ თოყაევი, ამერიკელი მილიარდელი ილონ მასკი, სულ 135 ადამიანი.