კახა კალაძე – მიზანმიმართულად მიმდინარეობს დისკრედიტაცია “პარტია” “რუსთავი 2”-ის მხრიდან

“ქართული ოცნების” თბილისის მერობის კანდიდატი კახა კალაძე საარჩევნო კამპანიაში პედაგოგების შესაძლო მონაწილეობის შესახებ გამოთქმულ კრიტიკას პასუხობს.
ნებისმიერ ადამიანს აქვს უფლება ჩაერთოს საარჩევნო კამპანიაში და მიზანმიმართულად ხდება, რომ შეხვედრები სამუშაო საათების შემდეგ იგეგმება, – ამის შესახებ პარტია “ქართული ოცნების” თბილისის მერობის კანდიდატმა კახა კალაძემ საარჩევნო კამპანიაში პედაგოგების შესაძლო მონაწილეობის თემასთან დაკავშირებით საუბრისას განაცხადა.
„რაც შეეხება პედაგოგებს, სხვადასხვა თანამშრომელს, ნებისმიერ ადამიანს აქვს უფლება ჩაერთოს საარჩევნო კამპანიაში, მოვიდეს ჩვენთან შეხვედრაზე. მიზანმიმართულად, ჩვენ შეხვედრებს 18:00 საათის შემდეგ ვმართავთ, რათა ყველა ადამიანს სამსახურის დასრულების შემდეგ ჰქონდეს შესაძლებლობა მოვიდეს, დაესწროს, გაეცნოს ჩვენს პროგრამას, ხედვებს, თუ რას ვაპირებთ მომდევნო 4 წლის განმავლობაში, როგორ ვაპირებთ ამა თუ იმ პროექტის განხორციელებას.
მიზანმიმართულად მიმდინარეობს დისკრედიტაცია “პარტია” “რუსთავი 2”-ის მხრიდან, მაგრამ ჩვენ აუცილებლად გავაგრძელებთ შეხვედრებს, აუცილებლად გავაგრძელებთ იმას, რომ საზოგადოებას გავაცნობთ ყველა პროექტს და პროგრამას, რომლის განხორციელებასაც ვგეგმავთ მომდევნო 4 წლის განმავლობაში”, – განაცხადა კახა კალაძემ.