საქართველოს მთავრობის განკარგულებით, წალკის მუნიციპალიტეტში მცხოვრები 200-მდე ეკომიგრანტი ოჯახი საცხოვრებელი სახლის მესაკუთრე გახდა, – ამის შესახებ ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრო იტყობინება.
მათივე ინფორმაციით, მინისტრი სოზარ სუბარი წალკაში ხვიჩა ვიბლიანის 5-სულიან ოჯახს ესტუმრა და საკუთრების დამადასტურებელი მოწმობა პირადად გადასცა.
სამინისტროს ცნობით, საცხოვრებელი ფართით უზრუნველყოფის პარალელურად, ხვიჩა ვიბლიანს მიწის ნაკვეთიც დაუკანონდა, სადაც სასოფლო-სამეურნეო პროდუქტები მოჰყავს. ვიბლიანების ოჯახმა ფუტკარიც მოაშენა, რაც მათთვის შემოსავლის დამატებით წყაროს წარმოადგენს.
როგორც უწყებაში განმარტავენ, ეკომიგრანტი ოჯახებისთვის 2004-2009 წლებში შესყიდული სახლების დაკანონების პროცესი მხოლოდ 2015 წელს დაიწყო. ამ ეტაპზე, ქვემო ქართლის რეგიონში სახლი საკუთრებაში უკვე 400-მდე ოჯახს გადაეცა.
„დაკანონების პროექტის პარალელურად, სამინისტრო 2013 წლიდან, ეკომიგრანტი ოჯახებისთვის საცხოვრებელი სახლების შესყიდვის პროგრამასაც ახორციელებს. მნიშვნელოვანია, რომ ეკომიგრანტი ოჯახები განსახლების ადგილსა და სახლს უკვე საკუთარი სურვილით ირჩევენ“, – ნათქვამია ინფორმაციაში.
სამინისტრომ ქვემო ქართლის რეგიონში სახლი 50-მდე ეკომიგრანტ ოჯახს შეუსყიდა, მათ შორის, 20 წალკის მუნიციპალიტეტში მდებარეობს
წალკის მუნიციპალიტეტში 200-მდე ეკომიგრანტ ოჯახს სახლი დაუკანონდა
2017/10/07 17:58:21
კომენტარები
ნანახია: 1083 ჯერ