სოფიო კილაძის აზრით, “ნაციონალური მოძრაობა” დარბევის პროვოცირებას ცდილობს.
ამის შესახებ კილაძემ ჟურნალისტებს თბილისის საკრებულოსთან განვითარებული მოვლენების შეფასებისას განუცხადა.
“ბიძინა ივანიშვილი არის ადამიანი, რომელმაც უამრავი კარგი რამ გააკეთა ამ ქვეყნისთვის და ოპოზიცია ყველანაირად ცდილობს, რამენაირად ჩირქი მოსცხოს მის სახელს, თუმცა ზუსტად ვიცი, ეს არ გამოუვა. ხალხმა ძალიან კარგად იცის, რა დამსახურება აქვს ბიძინა ივანიშვილს ჩვენი ქვეყნის და ერის წინაშე. ეს არის “ნაციონალური მოძრაობის” პროვოკაცია, რომ იქნებ გამოიწვიონ ხელისუფლება, იქნებ ვინმემ დაარბიოს, მაგრამ ჩვენი სამართალდამცავი სისტემა არის მოწოდების სიმაღლეზე, ყველაფერი უნდა იყოს და იქნება კიდეც კანონის შესაბამისად”,- განაცხადა კილაძემ.
რაც შეეხება პარლამენტის დეპუტატების არშეშვებას საკრებულოს სხდომაზე, რაც რეგლამენტის დარღვევაა, კილაძის თქმით, არ იცის, ამ კონკრეტულ შემთხვევაში რა გახდა საკრებულოს თავმჯდომარის გადაწყვეტილების საფუძველი და კომენტარს ვერ გააკეთებს.
“არგუმენტები არ ვიცი, ალბათ, უნდა შევისწავლო ეს თემა და დაველაპარაკო ბატონ გიორგის”,- დასძინა სოფიო კილაძემ.