ოზურგეთის მერობის დამოუკიდებელმა კანდიდატმა კოტე შარაშენიძემ განაცხადა, რომ თითოეულ ტერიტორიულ ორგანოში ოზურგეთის მუნიციპალიტეტის მერის წარმომადგენელის დანიშვნა მოსახლეობასთან იქნება შეთანხმებული და თავისთავად თითოეული სოფლის გამგებლის დანიშვნის საკითხიც მოსახლეობასთან კონსულტაციების შემდეგ გადაწყდება.
როგორც დამოუკიდებელი მერობის კანდიდატის შტაბის პრესსამსახური იუწყება, მერობის დამოუკიდებელი კანდიდატი, კონსტანტინე შარაშენიძე, წინასაარჩევნო აგიტაციის ფარგლებში მოსახლეობასთან შეხვედრებს განაგრძობს:
„დამოუკიდებელი კანდიდატის ყველა შეხვედრა ხალხმრავლობით გამოირჩევა, რაც კიდევ ერთხელ მიანიშნებს იმ ფაქტზე, რომ მიუხედავად მუქარისა, ოზურგეთის მოსახლეობა უკან დახევას არ აპირებს. კონსტანტინე შარაშენიძემ ამ დროისთვის თავისი შტაბის წარმომადგენლებთან ერთად უკვე 50-მდე შეხვედრა გამართა და მოსახლეობას დაჰპირდა, რომ ყველა ნაბიჯს მათთან შეთანხმებით გადადგამს. ასევე მოსახლეობასთან იქნება შეთანხმებული თითოეული სოფლის გამგებლის დანიშვნის საკითხიც. ამ ეტაპზე არცერთი სოფლის გამგებლის ვინაობა არაა ცნობილი. როგორც კონსტანტინე შარაშენიძემ განაცხადა, ნატანების, ბახვის, ლიხაურის, ბაილეთისა თუ სხვა სოფლების გამგებლების ვინაობა მხოლოდ მას შემდეგ გახდება ცნობილი, რაც მოსახლეობა თავად წარადგენს თავის სასურველ კანდიდატს”, – ნათქვამია გავრცელებულ ინფორმაციაში.