The New Yorker-ის ინფორმაციით, აშშ-ში მშობლები 4 წელია ცდილობენ დაამტკიცონ, რომ მათი შვილი, რომელიც წარუმატებელი ოპერაციის შემდეგ ექიმებმა გარდაცვლილად გამოაცხადეს, ცოცხალია. ამის შესახებ სტატიას გამოცემა The New Yorker-ი აქვეყნებს.
შემთხვევა 2013 წელს მოხდა, როდესაც მშობლებმა შვილი ოკლენდის საავადმყოფოში (კალიფორნია) ადენოიდებზე საოპერაციოდ მიიყვანეს. ოპერაციის შემდეგ, ბავშვს ცხვირიდან და ყელიდან სისხლდენა დაეწყო, თუმცა ექთნებმა ამას ყურადღება არ მიაქციეს. ექიმს კი, რომელმაც ოპერაცია გააკეთა, სამუშაო საათები უკვე დასრულებული ჰქონდა.
ოპერაციის ღამეს გოგოს გული გაუჩერდა. მისი რეანიმირება შეძლეს, თუმცა გოგომ გარემოსტიმულებზე რეაგირება შეწყვიტა, ელექტროენცეფალოგრამამ კი ტვინის ფუნქციონირება ვერ დააფიქსირა. ორი დღის შემდეგ ჯაჰი მაკმატს ტვინის სიკვდილი დაუდგინეს.
კალიფორნიის შტატში ამ დიაგნოზის შემთხვევაში ადამიანს გარდაცვლილად აცხადებენ და ხელოვნური მართვის აპარატიდან ორ დღეში თიშავენ. თუმცა მშობლებმა ექიმებს წინააღმდეგობა გაუწიეს და ამის უფლება არ მისცეს.
მშობლებმა სამკურნალოდ ფულის შეგროვება დაიწყეს და შეაგროვეს კიდეც, ბავშვი ნიუ-ჯერსის ერთ-ერთ კლინიკაში გადაიყვანეს, სადაც ოპერაცია ჩაუტარდა.
რამდენიმე თვის შემდეგ გოგომ დედის სიტყვებზე რეაგირება დაიწყო. მალე მას მენსტრუალური ციკლიც დაეწყო, რაც ტვინის ჰიპოთალამუსის ფუნქციონირების გარეშე შეუძლებელია. 2014 წელს გოგო საავადმყოფოდან გაწერეს, თუმცა ისტორიაში ისევ ჩაიწერა, რომ მისი ტვინი მკვდარია. 2015 წლის შემდეგ მშობლები საავადმყოფოს უჩივიან და სასამართლოს გზით ცდილობენ დაამტკიცონ, რომ მათი შვილი ცოცხალია.