ჟურნალისტი, ანალიტიკური-საინფორმაციო პორტალის “კვირას” დამფუძნებელი ქეთი ხოსიტაშვილი სოციალურ ქსელში წერს:
“ეს ფოტოები 3 წლის წინანდელია. „სითი ინსტიტუტი საქართველოსთან“ ხელშეკრულება „კვირამ“ ზუსტად 3 წლის წინ გააფორმა და ნაყოფიერი საქმიანი თანამშრომლობაც დავიწყეთ, თუმცა ჩვენი მეგობრობა ათწლეულებს ითვლის…
თბილისის გენერალური გეგმის პროექტზე მუშაობის პარალელურად, ერთობლივად დავაარსეთ ახალი ვებგვერდი – „სითი კვირა“, ჩავწერეთ გადაცემების ციკლი, მოვამზადეთ სტატიები…შევეცადეთ, მაქსიმალურად ღია და საჯარო ყოფილიყო პროექტი, რომელზეც ქართველი და უცხოელი, ძალიან ავტორიტეტული ადამიანები მუშაობდნენ და უზარმაზარი შრომა გაწიეს.
ვთვლი, რომ მეც ჩემი პატარა წილი და წვლილი შევიტანე თბილისის გენერალური გეგმის პროექტის შექმნის უმნიშვნელოვანეს პროცესში და ახლაც გულისყურით ვადევნებ თვალს დადებით თუ კრიტიკულ შეფასებებს, რაც თან სდევდა და სდევს პროექტს.
ახლა კი, როდესაც გენგეგმის ბედი დასკვნით ფაზაშია, მინდა, ძალიან მოკლედ ჩემი პოზიცია გამოვხატო:
ვის შეიძლება არ მოსწონდეს პროექტი და ვინ შეიძლება ცდილობდეს მის ჩაგდებას?
☑️ ისინი, ვინც დედაქალაქში ქაოსური მშენებლობების დასრულებით არ არიან დაინტერესებულნი და „ამღვრეულ წყალში თევზის დაჭერა ურჩევნიათ”;
☑️ ისინი, ვინც ამ პროექტის შესაჩერებლად სოლიდური ფული გადაიხადა – თბილისი პატარა ქალაქია და ყველამ ყველაფერი ზედმიწევნით ვიცით;
☑️ ისინი, ვინც მერიის მიერ ამ პროექტის მიღებისას, „სითი ინსტიტუტი საქართველოს“ კონკურენტები იყვნენ და ბუნებრივია, დაინტერესებულ მხარეს წარმოადგენენ;
☑️ ისინი, ვისაც უბრალოდ, არ აქვს წაკითხული დოკუმენტი (ჩემი აზრით, ავტორების გარდა, არც არავის აქვს წაკითხული – „ცისფერი მთებივითაა“) და არ იციან მისი მნიშვნელობა – არიან ჩემ მიერ ზემოთ ჩამოთვლილი სამი „ჯგუფიდან“ რომელიმეს გავლენის ქვეშ.
მე იმედი მაქვს, რომ მერია მიიღებს ამ დოკუმენტს – როგორც წესი, კახა კალაძე რაციონალურ გადაწყვეტილებებს იღებს და ამ შემთხვევაშიც, არ მგონია, ცალსახად ხაზი გადაუსვას დოკუმენტს, რომელსაც მისი წინამორბედი დედაქალაქის მმართველობა 3 წლის განმავლობაში განიხილავდა, დოკუმენტის მუშაობაში თავიდან ბოლომდე ჩართული იყო და თვეში რამდენჯერმე ეცნობოდა გენგეგმაზე მუშაობის პროცესს, ავტორებს ხანდახან შენიშვნებს აძლევდა, მაგრამ, როგორც წესი, ღიად და საჯაროდ იწონებდა.
ასე არ ხდება: ერთ დილას გაიღვიძო და სამწლიან კოორდინირებულ სამუშაოს ხაზი გადაუსვა.
მაგ ლოგიკით, ჩვენ შეიძლება ბევრჯერ შეგვეცვალოს ქალაქის მერი და ყველა მერის ცვლილებას ხომ არ გადავაყოლებთ მაღალბიუჯეტიან პროექტებს, მრავალწლიანი შრომით?
ასე არ ხდება, სამი წელი მოგწონდეს, ტაშს უკრავდე და ახლა გესუსტებოდეს…
თანაც, ყველამ ვიცით, დოკუმენტში ცვლილებები კალაძის მთავრობის პერიოდშიც შევიდა. „სითი ინსტიტუტი საქართველოს“ არ დაზარებია დედაქალაქის ამჟამინდელი მერის შენიშვნები გაეზიარებინა და კიდევ ერთხელ დახვეწა პროექტი.
მე იმედი მაქვს, რომ ეს შრომა უკვალოდ არ ჩაივლის,
მე იმედი მაქვს, რომ „სითი ინსტიტუტის“ ოპონენტები ერთხელ მაინც გვერდზე გადადებენ ვიწრო ინტერესებს, ამბიციებს, შუღლს… და ყველა ერთად ვიფიქრებთ „დაბეტონებული“ თბილისის ხსნაზე… ეს დოკუმენტი კი მართლა ხსნაა ქალაქისთვის და ერთადერთი გამოსავალიც!
არაფერია გამოუსწორებელი. ბოლოს და ბოლოს, თუ ქართველი ექსპერტების გამოცდილებას და ავტორიტეტს არ ვენდობით, გახსენებთ იმ გვარებს, რომლებსაც მსოფლიო ურბანული და არქიტექტურული წრეები იცნობენ და რომლებიც პროექტის მომზადების პროცესში ასევე აქტიურად იყვნენ ჩართულნი:
გერმანელი ექსპერტი იოახიმ შარესი, კომპანია Albert Speer + Partner GmbH -ის დაფუძნებელი.
განხორციელებული აქვს პროექტები: გენერალური სტრატეგიული ურბანული გეგმა ქალაქი ალესანდრიისთვის 2032 წლისთვის; ეგვიპტე; სამოქმედო გეგმა ტრანზიტზე ორიენტირებული პროექტისთვის – ერ-რიადი, საუდის არაბეთი; ასწლიანი ქალაქის გენერალური გეგმა, აბუჯა, ნიგერია; “ფრანკფურტი ყველასათვის” – განვითარების გეგმა, მიდლთაუნის გენერალური გეგმა, კიოლნი, გერმანია და სხვა.
ფრანგი ექსპერტი ალფრედ პეტერი საკუთარი სტუდიის შექმნამდე, სტრასბურგში, კომპანია Alexandre CHEMETOFF-ში მუშაობდა.
მის მიერ განხორციელებული პროექტებია: მონპელიე – ეკო ქალაქის დაგეგმარება; გრანდ პარიზი – მომავალი მეტროპოლიის ხედვა; გრენობილი – მდინარე ისერის სანაპიროების დაგეგმარება; სოფია ანტიპოლისი 2030 მასტერ პლანი; სტრასბურგის ტრამვაი – ტრამვაის ურბანული ინტერგაცია ქალაქში, მარსელის, სტრასბურგის ქალაქგეგმარებითი პროექტები და სხვა.
ავსტრიელი იოსტ მაზური, კომპანია DR. BRENNER INGENIEURGESELLSCHAFT MBH -ში, 1978 წლიდან უზრუნველყოფდა კერძო და საჯარო პროექტების განხორციელებას. 2008 წელს კომპანია გახდა უდიდესი ავსტრიული კომპანია BERNARD Group -ის ნაწილი, რომელიც მსოფლიო მასშტაბით ახორციელებს საინჟინრო ინფრასტრუქტურული და სატრანსპორტო პროექტების სრულ ციკლს.
მაზურის განხორციელებული აქვს პროექტები: ჩინეთის, პეკინის ჰაიდიარის რაიონის სატრანსპორტო მასტერპლანი; კიოლნის სატრანსპორტო მასტერპლანი; პოტსდამის ცენტრის სატრანსპორტო კვლევა; საუდის არაბეთში, წმინდა ქალაქ მექას აღმოსაველთ-დასავლეთ დერეფნის კვლევა-განვითარება; მაღალგამტარუნარიანი ავტობუსების – BRT ხაზის შესწავლა და სხვა.
გენგეგმის პროექტში ჩართული სამივე პირი ახლახანს იმყოფებოდა თბილისში (თუმცა, დოკუმენტზე სხვა უცხოელებიც მუშაობდნენ, რომლებსაც ასევე უზარმაზარი პროფესიული გამოცდილება და ავტორიტეტი აქვთ). მერიასაც შეხვდნენ, პრეზენტაციას გამართეს. აღნიშნეს, რომ დოკუმენტი საერთაშორისო სტანდარტების შესაბამისია, კარგია… ცოტა გაუკვირდათ, ასეთი მნიშვნელობის დოკუმენტის გარშემო ატეხილი აჟიოტაჟი, მაგრამ, დაიტოვეს იმედი, რომ ყველაფერი კარგად იქნება და „დაბეტონებულ“ თბილისთან ერთად დაგვტოვეს.
მეც ვიმედოვნებ, რომ ყველაფერი მართლაც კარგად იქნება,
რაღა დარჩა…სულ ცოტა.
მეც ვიმედოვნებ, რომ ადამიანები, ვინც რაღაც მიზეზების გამო, უსაფუძვლო კრიტიკით არიან დაკავებულნი, შეაფასებენ უმძიმეს რეალობას, რაც გვაქვს და იფიქრებენ ხვალინდელ დღეზე. ხვალინდელი დღე კი ამ მოცემულობით არ გვექნება, ვერ გვექნება – ვერ გვექნება, თუ დედაქალაქს დროულად, გადაუდებლად, სასწრაფოდ არ მივაწოდეთ ჟანგბადი. თბილისს ხელოვნური სუნთქვა სჭირდება!
სხვანაირად ვერ გადავარჩენთ და ეს გადაუდებელი დახმარება იმ დოკუმენტის მიღებაა, რომლის ბედიც ამ დღეებში საბოლოოდ გადაწყდება და რომელიც თბილისს გადაარჩენს.
მინდა მჯეროდეს, რომ ამ რეალობას თბილისელები სწორად აღიქვამენ და ჩვენ ერთად დავდგებით დედაქალაქის გადასარჩენად!” – წერს ხოსიტაშვილი.
