რუსეთის ქალაქ კემეროვოს სავაჭრო ცენტრში ხანძარი შესაძლოა, გაუმართავ ელექტროსადენს გამოეწვია.
ამის შესახებ Dautche Welle, კემეროვოს ოლქის ტექნიკურ ზედამხედველობაში წყაროზე დაყრდნობით წერს.
წყაროს ინფორმაციით, შესაძლოა დარღვევები ელექტროსისტემის მონტაჟის დროს იყო დაშვებული, რომელიც „ძაბვის ვარდნის შემთხვევებისგან დაცული არ იყო”.
გარდა ამისა, მომხდარის სხვა ვერსიებიც განიხილება. კერძოდ, გამომძიებლები ცეცხლის განზრახ გაჩენის შესაძლებლობასაც განიხილავენ, თუმცა აღნიშნული ვერსია პრიორიტეტული ჯერჯერობით არ არის.
მომხდარის კიდევ ერთი სავარუდო სცენარია – ცეცხლთან გაუფრთხილებლობით მოპყრობა. წინასწარი ინფორმაციით, შესაძლოა სათამაშო ოთახში ერთ-ერთმა ბავშვმა სანთებელა შეიტანა და ბურთებს წაუკიდა ცეცხლი.
გამოძიების ვარაუდით, ხანძარი ან საბავშვო მოედანზე, ან კინოთეატრის ერთ-ერთ დარბაზში გაჩნდა. ამასთან, თვითმხილველების თქმით, სახანძრო განგაშმა არ იმუშავა, ცენტრალიზირებული ევაკუაცია კი ჩატარებული არ ყოფილა. ადამიანები გადარჩენის მიზნით ფანჯრებიდან ხტებოდნენ, ნაწილი კი შენობის სახურავზე ავიდა.
ფაქტზე გამოძიება სახანძრო მოთხოვნების დარღვევის მუხლით დაიწყო, რამაც ორი ან მეტი ადამიანის გარდაცვალება გამოიწვია.
რუსეთის საგამოძიებო კომიტეტმა ოთხი პირი დააკავა, მათ შორის არის იმ კომპანიის ხელძღვანელი, რომელიც სავაჭრო ცენტრს ემსახურებოდა. ასევე ეჭვმიტანილის სტატუსით დაკავებულია სავაჭრო ცენტრის მფლობელი ნადეჟდა სუდენოკი.
ხანძრის შედეგად, ამ დროის მონაცემებით, 64 ადამიანია დაღუპული.