ერეკლე კოდუას ადგილსამყოფელი ამ დროისთვის უცნობია

პროკურორ ჯარჯი წიკლაურის განცხადებით, შინაგან საქმეთა სამინისტროს სპეციალური ოპერატიული დეპარტამენტის ყოფილი უფროსის, ერეკლე კოდუას ადგილსამყოფელი ამ დროისთვის უცნობია. როგორც წიკლაურმა დღეს გამართულ ბრიფინგზე განაცხადა, ერეკლე კოდუაზე გამოცხადებულია ძებნა.
„ამ ეტაპზე მის მიმართ გამოცხადებულია ძებნა. იგი უკვე მსჯავრდებულია ორ საქმეზე. შესაბამისად, უცნობია მისი კონკრეტული ადგილსამყოფელი“, – განაცხადა პროკურორმა.
საქართველოს პროკურატურამ 2007 წლის 7 ნოემბერს სამაუწყებლო კომპანია “იმედში” უკანონოდ შეჭრის და ტელეკომპანიის დარბევის ფაქტზე, ერეკლე კოდუა სამსახურებრივი უფლებამოსილების ძალადობით გადამეტების ბრალდებით, სისხლის სამართლის პასუხისგებაში მისცა. პროკურატურის ინფორმაციით, გარდა ამისა, კოდუა მსჯავრდებულია ვალერი გელაშვილზე განხორციელებული თავდასხმის საქმეზე, რომელზედაც მიესაჯა 9 წლის ვადით თავისუფლების აღკვეთა და ე.წ. „ავტომანქანების საქმეზე“, რომელზედაც მიესაჯა 2 წლის ვადით თავისუფლების აღკვეთა.