ხორავას ქუჩაზე მოკლული დავით სარალიძის მამა ზაზა სარალიძე 27 მაისს აქციის ჩატარებას გეგმავს. როგორც სარალიძემ ჟურნალისტებს ხორავას ქუჩაზე, მკვლელობის ადგილზე გამართულ პრესკონფერენციაზე განუცხადა, ის მოუწოდებს ყველას თბილისში, პარლამენტის შენობასთან, 27 მაისს, 19:00 საათზე მივიდეს. როგორც სარალიძემ აღნიშნა, აქციის მთავარი მოთხოვნა სამართლიანობის აღდგენა იქნება.
„პირველად ვიმყოფები იმ ადგილზე, სადაც ჩემი შვილი მოკლეს. ძალიან დიდი ემოციური ფონია, თუმცა არ მაქვს იმის დრო, რომ ემოციებს ავყვე. მინდა მოვუწოდო საზოგადოებას, საქართველოს მოსახლეობას, არ აქვს მნიშვნელობა იქნება ეს პოლიტიკური პარტია თუ არა, მმართველი გუნდი იქნება, თუ საზოგადოების ნებისმიერი წევრი, მოვუწოდებ ყველას დამიდექით გვერდით იმ ჭეშმარიტების დადგენაში, რასაც დღესდღეობით პროკურატურა მალავს. 27 მაისს, 19:00 საათზე ჩავატარებთ მშვიდობიან აქციას მოთხოვნით – „აღდგეს სამართლიანობა“, – განაცხადა ზაზა სარალიძემ.
მისივე თქმით, დღეს ასევე დაგეგმილი აქვს შეხვედრა მთავარ პროკურორთან და თუ ამ შეხვედრის მსვლელობისას დანაშაულის ჩამდენი პირები პასუხისგებაში მიეცემიან, აქცია აღარ ჩატარდება.
„იქიდან გამომდინარე, რა პასუხებით წამოვალ მთავარი პროკურატურიდან და რა პასუხებს მივიღებ მთავარი პროკურორისგან, გადავწყვეტთ ჩატარდეს თუ არა, ან გაგრძელდეს თუ არა აქცია. თუ ჩვენი შეხვედრის დროს, ის პირები დაკავებული იქნებიან, ვინც კიდევ ჩაიდინა დანაშაული არა მხოლოდ დაჭრის ფაქტზე, არამედ თუ რაიმე წვლილი მიუძღვის ამ სასტიკ დანაშაულში, ის პირები, ვინც დაფარა დანაშაული და გაანადგურა მტკიცებულებები, ყველა პირის დაკავება თუ მოხდება, ამ შემთხვევაში ბოდიშს მოვუხდი საზოგადოებას და აქციაც აღარ ჩატარდება, რადგან სამართიანობა აღდგენილი იქნება“, – განაცხადა ზაზა სარალიძემ.