დოდო გუგეშაშვილი – არცერთ ეტაპზე გამოძიებისათვის უნდობლობა არ გამომიცხადებია

თადარიგის პოლკოვნიკმა დოდო გუგეშაშვილმა შსს-ს მასზე თავდასხმის და მისი შვილის მკვლელობის შესაძლო ვერსია წარუდგინა. ამ ვერსიებზე დოდო გუგეშაშვილმა „კვირას“ პრესკლუბში ისაუბრა.
“გუშინწინ ჩემი გაჟღერებული თხოვნა შს მინისტრთან შეხვედრის თაობაზე მყისიერად დაკმაყოფილდა და ბატონი გახარიას ქვეყანაში არ ყოფნის გამო, მე შევხვდი მის პირველ მოადგილეს, ბატონ საბანაძეს და ასევე ქალაქის პოლიციის სამმართველოს უფროსს. საუბრიდან დავასკვენი, რომ ბატონი საბანაძე უშუალოდ კურირებს ჩემი შვილის მკვლელობის საქმეს. მე და ჩემმა ადვოკატმა, ბატონმა გელა ნიკოლეიშვილმა მათ წარვუდგინეთ დოკუმენტაცია. საზოგადოებისთვის ცნობილია, რომ 2014 წლიდან, მე აქტიურად ვარ ჩართული უკრაინის საოკუპაციო რეჟიმისგან გათავისუფლების საქმეში.
მოგეხსენებათ, ჩემს ოჯახზე მოხდა შეკვეთილი თავდასხმა, რის შედეგადაც ჩემი ვაჟი მოკლეს, ხოლო მე მძიმედ დამჭრეს. ამ ამბიდან გარკვეული დროის შემდეგ მივიღე ინფორმაცია ჩემი მეგობრების მეშვეობით, რომ ჩემი რამდენიმე გამოფრენა უკრაინიდან საქართველოს სასაზღვრო დეპარტამენტის მიერ იყო დაფიქსირებული, როგორც ჩემი შემოსვლა რუსეთიდან (თუმცა ჩემს პასპორტში ცხადია, მსგავსი არაფერი ფიქსირდება) მოგეხსენებათ, უკრაინიდან არ არის არცერთი რეისი, რომელიც რუსეთში მიფრინავს და ასევე პირიქით. გამოდის, რომ მე ჰაერში გადავჯექი რუსეთის მიმართულებით მფრინავ თვითმფრინავში. საფუძვლიანი ეჭვი მაქვს, რომ ამ სტრუქტურაში არის ჩანერგილი რუსეთის სპეც-სამსახურის წარმომადგენელი, ან წარმომადგენლები, რომლებმაც შეგნებულად, ჩემი დისკრედიტაციის მიზნით, გააყალბეს დოკუმენტაცია. ვერ ვიტყვი, რომ ისინი მხოლოდ ჩემს წინააღმდეგ მიმართულ კამპანიას ახორციელებენ. ისინი მთლიანად ქართული სახელმწიფოს წინააღმდეგ მიმართულ კამპანიას სჩადიან. თუ ასეთ დაცულ სტრუქტურაში, მათ ძალუძთ, დოკუმენტაციის გაყალბება, ეს მაფიქრებინებს, როგორც ერთ-ერთ შესაძლო ვერსიას, რომ ჩემი ოჯახის ამოწყვეტის საქმეშიც სწორედ რუსეთის სპეც-სამსახურების ხელი ურევია, მითუმეტეს, რომ არავისთვის საიდუმლოს არ წარმოადგენს მე მათ ე.წ. „შავ სიაში“ ვარ ლიკვიდაციის ნებართვით.
დამკვეთი კი აშკარად ქართველი იყო, მე მას რამოდენიმეჯერ შევხვდი, როგორც ვეტერანს, ყოფილ სპეცნაზელს, როგორც შემდგომ აღმოჩნდა, იგი 3-ჯერ უჩემოდ შეხვედრია ჩემს ვაჟს, ჩემი სახლის კარი ვეტერანთათვის მუდამ ღიაა და ჩემდა სამწუხაროდ არ გადამიმოწმებია მისი ვინაობა, არსაიდან არ ველოდი საფრთხეს ჩემს სამშობლოში.
შსს აბსოლუტურად ყველა ვერსიას ამუშავებს, აქვე მინდა აღვნიშნო, რომ არცერთ ეტაპზე გამოძიებისათვის უნდობლობა არ გამომიცხადებია, ისინი ინტენსიურად მუშაობენ, როგორც მკვლელის, ასევე შემკვეთის დასადგენად, – განაცხადა თადარიგის პოლკოვნიკმა დოდო გუგეშაშვილმა.
შეგახსენებთ, რომ ამა წლის 7 თებერვალს თადარიგის პოლკოვნიკ დოდო გუგეშაშვილს საკუთარ საცხლში თავს დაესხნენ, თავდასხმა ტრაგიკულად დასრულდა, დაიღპა დოდო გუგეშაშვილის ერთადერთი ვაჟი, გრიგოლ გუგეშაშვილი, ხოლო თავად თადარიგის პოლკოვნიკი მძიმედ დაიჭრა.