ვიცე-პრემიერი, შინაგან საქმეთა მინისტრი გიორგი გახარია ზუგდიდში, დამოუკიდებლობის დღის საზეიმო ღონისძიებებს ესწრება.
გიორგი გახარიამ მოსახლეობას ქვეყნის დამოუკდებლობის 100 წლის იუბილე მიულოცა, უწყების მიერ ქალაქში მოწყობილ ღონისძიებებს და სივრცეებს გაეცნო.
„პირველ რიგში მინდა გითხრათ, რომ შინაგან საქმეთა სამინისტროს ერგო პატივი, ეს დღე დანარჩენ საქართველოს მივულოცოთ სამეგრელოდან, ზუგდიდიდან. ამას ჩვენთვის დიდი მნიშვნელობა აქვს, რადგან აქვე, გვერდით არის ჩვენი უდიდესი ტკივილი – აფხაზეთი, რომელიც დღეს არის ქვეყნის ყველაზე დიდი და მნიშვნელოვანი ამოცანა და გამოწევევა. მე მინდა სრულიად საქართველოს დამოუკიდებლობის ასი წელი მივულოცო. მინდა გითხრათ, რომ პირველი რესპუბლიკა იყო გამორჩეული მოვლენა ევროპის პოლიტიკურ ცხოვრებაში. ეს გახლდათ პირველი სოციალ-დემოკრატიული მთავრობა, ეს იყო ისეთი ფასეულობებისა და დემოკრატიული ღირებულებების მთავრობა და ინსტიტუცია, რომელზედაც ბევრი ევროპული სახელმწიფო ოცნებობდა. ვალდებულები ვართ ის მაღალი სტანდარტები, რომელიც დაგვიწესეს ჩვენმა წინაპრებმა, გავაუმჯობესოთ და კიდევ უფრო განვავითაროთ. ეს არის ჩვენი ფუნქცია და ეს არის ჩვენი გამოწვევა. უნდა ვიყოთ ორიენტირებული ხვალინდელ დღეზე. ყველამ ერთად, შრომით და თავდადებით უნდა განვავითაროთ ეს ქვეყანა იმისთვის, რომ საქართველო გახდეს შესაძლებლობების და არა გამოწვევების ქვეყანა“,- განაცხადა გიორგი გახარიამ.