ზაზა სარალიძე – ეს გამორიცხეთ, ამოიგდეთ თავიდან

„არავის მივცემ იმის უფლებას, რომ პოლიტიკური მიზნით გამოიყენოს ეს ტრაგედია“, – აცხადებს ხორავას ქუჩაზე მოკლული ერთ-ერთი არასრულწლოვნის მამა, ზაზა სარალიძე. როგორც მან „იმედის“ გადაცემაში „პირისპირ“ განმარტა, ის ეწინააღმდეგება მოსაზრებას მისი ოჯახის ტრაგედიის პოლიტიზების შესახებ და არავის მისცემს ამის უფლებას.
„აბსოლუტურად ვეწინააღმდეგები იმ აზრს, რომ თითქოს მე ნაციონალურ მოძრაობას ამოვუდექი გვერდში, ან მივეცი ჩემი შვილის სულით მანიპულირების უფლება. ეს გამორიცხეთ, ამოიგდეთ თავიდან“, – აცხადებს ზაზა სარალიძე.
27 მაისს, ლოზუნგით „ნუ მოკლავ“ რუსთაველის გამზირზე საპროტესტო აქცია გაიმართა. აქციაზე მისვლისკენ საზოგადოებას ზაზა სარალიძემ მოუწოდა, რომელიც თავისი შვილის მკვლელობის გამოძიების მიმდინარეობით უკმაყოფილოა. აქციაში პოლიტიკოსები, მათ შორის „ნაციონალური მოძრაობის“ წარმომადგენლები მონაწილეობდნენ.