გამომძიებელი: ვინც გ.მ -ს დაჭრის შესახებ გვაწვდიდა ინფორმაციას, დაკავების შემდგომ გამოძიებასთან აღარ თანამშრომლობდა

ერთადერთი, ვინც გ.მ -ს დაჭრის შესახებ გვაწვდიდა ინფორმაციას, იყო გ.ბ, რომელიც დაკავების შემდგომ გამოძიებასთან აღარ თანამშრომლობდა, – ამის შესახებ ხორავას ქუჩაზე მომხდარი მკვლელობის საქმის გამომძიებელმა ირაკლი ფიფიამ პარლამენტის დროებითი საგამოძიებო კომისიის სხდომაზე განაცხადა.
როგორც გამომძიებელმა განმარტა, იგი თავად შეხვდა სასჯელაღსრულების დაწესებულებაში გ.ბ-ს. თუმცა, იგი გამოძიებასთან არ თანამშრომლობდა.
„გ.ბ, მას შემდეგ რაც მას წაეყენა ბრალდება, მოთავსებულ იქნა სასჯელაღსრულების შესაბამის დაწესებულებაში, უარი განაცხადა ყველანაირ თანამშრომლობაზე, პირადად მე ვარ ნამყოფი სასჯელაღსრულების დაწესებულებაში და მისი გამოკითხვის, ასევე საგამოძიებო ექსპერიმენტის ჩატარების მიზნით, ასევე, დარწმუნებული ვარ, გაცნობილი ხართ საქმეს და დევს შესაბამისი ოქმები, იგი უარს აცხადებს, როგორც გამოკითხვაზე, ასევე საგამოძიებო მოქმედებებში მონაწილეობაზე, როგორც აღვნიშნე ერთადერთი პირი, რომელიც გ.მ.-ს ჯანმრთელობის მდგომარეობაზე გვაწვდიდა ინფორმაციას ეს იყო გ.ბ., რომლისგანაც ვერანაირი დამატებითი ინფორმაციის მიღება ვერ მოხერხდა“, – განაცხადა გამომძიებელმა.
ამავე სხდომაზე, გამომძიებელმა სასამართლო-სამედიცინო ექსპერტიზის ბიუროს დასკვნაზეც ისაუბრა.
„დაინიშნა საქმეზე კომისიური სამედიცინო ექსპერტიზა, აღნიშნულ ექსპერტიზას დაესვა შემდეგი სახის შეკითხვები, რა საგნით შეიძლება ყოფილიყო მიყენებული ეს დაზიანებები და ასევე, საქმეზე ამოღებული ორი ნივთმტკიცება, დანა გადაეგზავნა საექსპერტო დაწესებულებას, რათა მომხდარიყო ტანსაცმელზე არსებულ დაზიანებასთან შედარება. ტრანსოლოგიური ექსპერტიზის დასკვნა მოვიდა ივნისის თვეში, აღნიშნული დასკვნით არ გამოირიცხება, რომ აღნიშნული ჭრილობა შეიძლება მიყენებული იყოს წარმოდგენილი ორივე დანით, ან მსგავსი კონსტრუქციისა და ნიშან-თვისებების მქონე საგნით. ძნელი სავარაუდოა, მაგრამ ჩვენ ვართ გამომძიებლები და არაფრის გამორიცხვა არ შეგვიძლია. ჩვენ ვსაუბრობთ მხოლოდ და მხოლოდ მტკიცებულებებით, ვსაუბრობთ დადგენილი ფაქტობრივი გარემოებებით, ექსპერტიზის დასკვნებით და მოწმეთა ჩვენებებიდან მიღებული ინფორმაციით, შესაბამისად, ვერც ვერაფერს გამოვრიცხავთ, ვერც ვერაფერს დავადასტურებთ, სანამ ამის საშუალებას არ მოგვცემს კონკრეტული მტიცებულებები. ნაკლებად სავარაუდოა, რომ თავის მეგობრებს დაეჭრათ, მაგრამ სანამ არ გამოირიცხება ეს ვარაუდი, აღნიშნულთან დაკავშირებით გრძელდება გამოძიება, მიღებულია ახალი ექსპერტიზის დასკვნა, რომელიც გადაეგზავნა მწარმოებელ ორგანოს“, – განაცხადა ირაკლი ფიფიამ.