“იოსებ სიგუა შეუძლოდ იყო და საგამოძიებო კომისიის სხდომაზე ამიტომ ვერ გამოცხადდა – ავად პოლიციელებიც ხდებიან”

შინაგან საქმეთა მინისტრის მოადგილე, ნათია მეზვრიშვილის განცხადებით, ინფორმაცია, თითქოს იოსებ სიგუამ სამსახური დატოვა, სინამდვილეს არ შეესაბამება.

ნათია მეზვრიშვილის განცხადებით, შსს-ს თანამშრომელი იოსებ სიგუა ჯანმრთელობის მდგომარეობის გაუარესების გამო ვერ გამოცხადდა გუშინ საგამოძიებო კომისის სხდომაზე. მისივე თქმით, მას თანამდებობა არ დაუტოვებია და საგამოძიებო კომისიის კითხვებს, გამოჯანმრთელების შემდეგ გასცემს პასუხებს.

„სიგუა თანამდებობას ინარჩუნებს. ის შეუძლოდ იმყოფება, რამაც საზოგადოებაში გარკვეული კითხვები გააჩინა, თუმცა ეს ჩემთვის ცოტა გაუგებარია. პოლიციელებსაც აქვთ უფლება ავად გახდნენ, ავად პოლიციელებიც ხდებიან“, – განაცხადა მეზვრიშვილმა.

მისი თქმით, როგორც კი გამოჯანმრთელდება, იოსებ სიგუა დროებითი საგამოძიებო კომისიის სხდომაზე გამოცხადდება.

„ადამიანი ცუდად დაგეგმილად არ გამხდარა და შესაბამისად, პარლამენტი საქმის კურსში ვერ ჩააყენა. როგორც კი ჩვენთვის ამის შესახებ გახდა ცნობილი, კომისიას დაუყონებლივ მივაწოდეთ ინფორმცია. სამინისტროს არც ერთ წარმომადგენელს კომისიისთვის ინფორმაციის მიწოდებისა და გამოცხადების პრობლემა არ აქვს, საგამოძიებო კომისიის სხდომაზე ყველა გამოცხადდება”, – განაცხადა შს მინისტრის მოადგილემ.