მეც ასტიგმატიზმი მაქვს, ვიღაცამ დანა რომ ამოიღოს ამ ოთახში იმასაც გავარჩევ და დავინახავ ვინმეს რომ დაარტყას, – ასე მიმართა ხორავას ქუჩაზე მომხდარი მკვლელობის საქმეზე პარლამენტში შექმნილი საგამოძიებო კომისიის ფარგლებში დეპუტატმა მამუკა მდინარაძემ ხორავას ქუჩის ტრაგედიის მოწმეს ნიკოლოზ იორდანიშვილს.
მამუკა მდინარაძემ მოწმე ნიკოლოზ იორდანაშვილს ტელეფონში ზაზა სარალიძის ფოტო აჩვენა. მდინარაძემ ეს მას შემდეგ გააკეთა, რაც იორდანაშვილმა აღნიშნა, რომ ინციდენტის დეტალები რის გამოც ვერ გაარკვია ერთ-ერთი მიზეზი მისი მხედველობის პრობლემა იყო.
„თქვენ იმდენივე მეტრში ამოიცანით ზაზა სარალაძე ტელეფონში, დაახლოებით რამდენ მეტრშიც მოხდა დადუნაშვილის მკვლელობა თქვენგან დაშორებით. თქვენ თქვით, რომ მხედველობაზე რაღაც პრობლემები გაქვთ. მე პირადად მაქვს ოთხნახევარი მინუსი ასტიგმატიზმი და ნამდვილად შემიძლია ამ და გაცილებით მეტ მანძილზე ამ ოთახში რაც ხდება გავარჩიო. ვიღაცამ დანა რომ ამოიღოს იმასაც გავარჩევ და დავინახავ ვინმეს რომ დაარტყას. თქვენზე სამით მეტი ასტიგმატიზმი მაქვს. თქვენ ახლა სამ მეტრში ტელეფონში ამოიცანით ზაზა სარალიძე. ხშირად არიან პასუხისმგებლობით სავსე მოქალაქეები, ვისი მეშვეობითაც იხსნება საქმეები. ამ ფონზე თქვენ მაინც არ გინდათ არაფერზე ისაუბროთ?“-განაცხადა მამუკა მდინარაძემ.
ამის საპასუხოდ ნიკოლოზ იორდანაშვილმა კიდევ ერთხელ აღნიშნა, რომ მას არაფერი დაუნახავს და ვერ იხსენებს ჩხუბში მონაწილე პირებს.