იუსტიციის უმაღლესი საბჭოს მდივნის, გიორგი მიქაუტაძის თქმით, მოსამართლეთა საკვალიფიკაციო გამოცდების პირველი ეტაპის შედეგები დამაკმაყოფილებელია. მისივე განმარტებით, შეფასების სისტემა, რომელიც საბჭომ შეიმუშავა, მოსამართლეთა შეფასებისას მაქსიმალურად გამორიცხავს სუბიექტურ ფაქტორს და არსებული მოდელით, მოსამართლეები ობიექტურად ფასდებიან. ამის შესახებ მიქაუტაძემ „ქრონიკასთან“ ისაუბრა.
„შედეგი, რომელიც გამოცდების შემდეგ მივიღეთ, ნორმალურია. ეს გამოცდის პირველი ეტაპია. ერთი კვირის შემდეგ გვექნება მისი მეორე ეტაპი. პირველი ეტაპი ტარდება ტესტების ფორმით, ხოლო მეორე ეტაპზე მათ ექნებათ ხუთ ღია ფორმის კითხვაზე პასუხი გასაცემი. საკვალიფიკაციო გამოცდებში გვქონდა რამდენიმე სიახლე დანერგილი.
გამოცდისთვის, კომისიის ყველა წევრმა გაიარა სპეციალური ტრენინგები და კურსი, ტესტების შედგენის მეთოდიკაში. ტესტები და კითხვები სრულიად თანამედროვე მეთოდით შედგა. კითხვები სირთულის სამი დონის მიხედვითაა დაყოფილი.
გამოცდის მეორე, წერით ეტაპზე, თითოეულ ნამუშევარს გაასწორებს კომისიის ორი წევრი. ისინი იქნებიან შესაბამისი დარგის სპეციალისტები, – კითხვის მიხედვით. მათ არ ეცოდინებათ არც ერთმანეთის და არც გამოსაცდელის ვინაობა“ – თქვა მიქაუტაძემ.
მან საერთაშორისო გამჭვირვალობა – საქართველოს ბოლო კვლევაზეც ისაუბრა. კვლევაში იყო მინიშნებები გავლენიანი მოსამართლეების შესახებ.
„მე ძალიან ყურადღებით ვეცნობი ყველა კვლევას, რომელიც სასამართლოს შეეხება. ცოტა ხნის წინ გავეცანი საიას მიერ მომზადებულ მონიტორინგის ანგარიშს, რომელსაც ჩვენც დავესწარით და ჩვენი პოზიციებიც წარმოვადგინეთ. რაც შეეხება საერთაშორისო გამჭვირვალობა – საქართველოს კვლევას, რომელშიც საუბარი იყო კორუფციის რისკებზე სასამართლოში, – მე ვერ ვიტყოდი, რომ ეს კვლევა ობიექტურია. კვლევა ჩატარებულია 6 ანონიმური პირისა და უზენაესი სასამართლოს თავმჯდომარის გამოკითხვის საფუძველზე.
დღესაც დასტურდება, რომ სასამართლო ყოველდღიურად აუმჯობესებს თავის საქმიანობას. სასამართლო არასდროს ყოფილა ამაზე დამოუკიდებელი. მიუხედავად ამისა, ვადასტურებთ იმასაც, რომ სასამართლოს წინაშე არის დიდი გამოწვევები, არსებობს საქმეთა გადატვირთულობის პრობლემა. საქმეთა განაწილების მიმართულებით, ვფიქრობ, რომ დღეს პრობლემა აღარ არსებობს. ჩვენ ავამოქმედეთ საქმეთა ელექტრონული განაწილების წესი და თეორიულადაც კი, შეუძლებელია, ვინმემ რაიმე ზეგავლენა იქონიოს საქმეთა განაწილებაზე“ “ – თქვა მიქაუტაძემ.
მოსამართლის საკვალიფიკაციო გამოცდის პირველ ეტაპზე ზღვარი 73-მა მონაწილემ გადალახა. მათგან ერთი არის საერთო სპეციალიზაციით, 21 – სამოქალაქო და ადმინისტრაციული სპეციალიზაციით, ხოლო 51 – სისხლის სამართლის სპეციალიზაციით.
მოსამართლეთა საკვალიფიკაციო გამოცდა 2015 წლის ნოემბრის შემდეგ არ ჩატარებულა. იუსტიციის საბჭოში აცხადებენ, რომ მას მომავალში ყოველ წელს ჩაატარებენ.
მოსამართლის საკვალიფიკაციო გამოცდის მეორე ეტაპი 28 ივლისს გაიმართება.
გამოცდის პირველი ეტაპი დღეს საქართველოს ეროვნულ უნივერსიტეტში (SEU) ჩატარდა.