მარნეულის ყოფილი მერის, თემურ აბაზოვის ადვოკატები მთავარ პროკურორს საქმის პირად კონტროლზე აყვანას სთხოვენ. გაგი მოსიაშვილის თქმით, ბრალდების მხარე 6 აგვისტოს ჩანიშნული წინასასამართლო სხდომის გადადების შუამდგომლობით სასამართლოს მიმართავს და ვადის გადაწევას 20 სექტემბრამდე მოითხოვს. ინფორმაციას 1tv ავრცელებს
ბრალდებულის ადვოკატების განცხადებით, მათ უჩნდებათ ეჭვი, რომ პროკურატურამ ორ თვეში შესაბამისი მტკიცებულებების მოპოვება ვერ შეძლო, ახლა კი ცდილობს ცრუ მოწმეები ჩართოს საქმეში.
უფლებადამცველები ამტკიცებენ, რომ მათი დაცვის ქვეშ მყოფი საქმიანობის პერიოდში ნეპოტიზმსა და კორუფციას ებრძოდა, რაც გარკვეული ჯგუფებისთვის მიუღებელი იყო, რადგან მათ მარნეულში გავლენის მოპოვება სურდათ.
„ ჩვენი ინფორმაციით, ამ პროვოკაციამდე ცოტა ხნით ადრე აბაზოვის მიმართ ფიზიკური შეურაცხყოფაც დაფიქსირდა. ჩვენ არც იმას გამოვრიცხავთ, რომ ფაქტი, რომელიც წინ უსწრებდა ინციდენტს, ამ შემთხვევის საფუძველი ყოფილიყო”,- განმარტა გაგი მოსიაშვილმა.
ადვოკატების ინფორმაციით, აბაზოვს შემთხვევამდე ერთი თვით ადრე სისტემატურად ეგზავნებოდა შეურაცხმყოფელი შეტყობინებები.
მათ დაზარალებულ ელჩინ ალახვრდიევის შესახებაც ისაუბრეს და განაცხადეს, რომ მან ორი წლის წინაც დაადანაშაულა ერთი პირი ღირსების შემლახავ მოპყრობაში, თუმცა მოგვიანებით თქვა, რომ ეს აღელვებით იყო გამოწვეული.
„დაზარალებულს ორი წლის წინ მსგავსი საჩივრები სხვა პირის მიმართაც ჰქონდა შეტანილი და შემდეგ გამოტანილი თავისი სურვილით. გვაქვს ეჭვი, რომ ეს ადამიანი ვიღაცაზე მუშაობს და ამიტომ ბევრ ტყუილს ამბობს“,- განაცხადა მერაბ ჩიქოვანმა.