სმიტების ოჯახის მკვლელობაში ბრალდებული მალხაზ კობაური თავს დამნაშავედ არ ცნობს. დღეს მას პირველი შეხვედრა ჰქონდა სახაზინო ადვოკატთან, რომელიც ბრალდებულის დაცვის გარკვეულ სტრატეგიაზე საუბრობს.
შს მინისტრის მოადგილე ნათია მეზვრიშვილი კიდევ ერთხელ აცხადებს, რომ სამხარაულის ექსპერტიზამ დაკავებულსა და მსხვერპლს შორის სექსუალური კავშირი დაადასტურა.
„მწყემსის საქმეს რაც შეეხება, ამასთან დაკავშირებით ბოლო დასკვნა, რომელიც მიიღო შს სამინისტრომ, კერძოდ ეს არის სასამართლო სამედიცინო ექსპერტიზის დასკვნა, რომელმაც სექსუალური კავშირი დაადასტურა ბრალდებულსა და გარდაცვლილს შორის. რაც შეეხება დამატებით დეტალებს, თავს შევიკავებ მანამ, ვიდრე არ მივიღებთ კომპლექსური ექსპერტიზის დასკვნას, რომელიც უკვე დამატებითი დასკვნების გაკეთების საშუალებას მოგვცემს. გამოძიება გრძელდება, დამატებითი მტკიცებულებების მოპოვების პროცესი მიმდინარეობს ყოველდღიურ რეჟიმში”, – განაცხადა მეზვრიშვილმა.
7 ივლისს დუშეთის მუნიციპალიტეტში, ხადის ხეობაში საქართველოსა და აშშ-ის ორმაგი მოქალაქე ცოლ-ქმარი 1975 და 1976 წელს დაბადებული რაიან სმიტი და მისი მეუღლე ლორა დაღუპული იპოვეს. მოგვიანებით იპოვეს მათი 4 წლის ბავშვის ცხედარიც.