ადიგენის მუნიციპალიტეტის მაჟორიტარი დეპუტატის და „ევროპული საქართველოს“ წევრის, ზურაბ შაინიძის ცემის საქმეზე შსს-მ გამოძიება დაიწყო. უწყების განცხადებით, გამოძიება სისხლის სამართლის კოდექსის 126-ე მუხლის პირველი პრიმა ნაწილის ბ ქვეპუნქტით მიმდინარეობს. ეს მუხლი ძალადობას გულისხმობს.
შსს-ში ამბობენ, რომ ინციდენტის მონაწილე ორივე მხარის გამოკითხვა მიმდინარეობს.
ადიგენის მუნიციპალიტეტის მაჟორიტარი დეპუტატი, „ევროპული საქართველოს“ წევრი ზურაბ შაინიძე „ქართული ოცნების“ წევრებს ცემაში ადანაშაულებს. მისი თქმით, 28 ივლისს სოფელ ზანავისა და გომაროს მიმდებარე ტერიტორიაზე, ფერსის მთაზე შუამთობის დღესასწაული აღინიშნებოდა. ღონისძიების დასრულების შემდეგ კი სტადიონზე ახალგაზრდებს შორის დაწყებული კამათი დაპირისპირებაში გადაიზარდა.
ადიგენის მუნიციპალიტეტის მერი ზაქარია ენდელაძე მომხდარ ჩხუბთან “ქართული ოცნების” კავშირს უარყოფს.