“ხორავას ქუჩაზე მოზარდების მკვლელობის საქმეზე დანაშაულის დაფარვის საქმის პროკურორმა ჟურნალისტებთან საუბრისას განმარტა, რომ მსჯავრდებულის მშობელმა სასამართლოს საქმეზე მნიშვნელოვანი ინფორმაცია მიაწოდა, რომელიც სხვა მოწმეების ჩვენებებთან თანხვედრაშია. პროკურორ გიორგი ქობულაძის ინფორმაციით, დღეს დაკითხულმა პირმა იმ გარემოებებზე ისაუბრა, თუ რა ვითარებაში გადასცეს მას შვილი. თუმცა, პროკურორის შეფასებით, გადამეტებული იქნება იმის თქმა, რომ მოწმემ ვინმეს მამხილებელი ჩვენება მისცა.
“მსჯავრდებულის დედას უფრო ნაკლები ინფორმაცია ჰქონდა, თუმცა მამას ჰქონდა გარკვეული მნიშვნელობის ინფორმაცია მოცემულ საქმესთან დაკავშირებით რაც მიაწოდა სასამართლოს. გადამეტებული იქნება იმის თქმა, რომ ვინმეს მამხილებელი ჩვენება მისცა, თუმცა მის მიერ გაჟღერებული ინფორმაცია მნიშვნელოვანი იყო, ვინაიდან დაასახელა გარკვეული გარემოებები, რომელსაც სხვა მოწმეებიც ასახელებენ და ამ მოწმეების ჩვენებებთან მოვიდა მისი ჩვენება თანხვედრაში”, – განაცხადა საქმის პროკურორმა.
ამასთან, როგორც გიორგი ქებულაძემ ჟურნალისტებს ამცნო, მსჯავრდებულ გ.ჯ.-ს მშობლებმა განაცხადეს, რომ ვიდრე შვილი თავად არ წამოიყვანეს, არ ჰქონდათ ინფორმაცია იმის თაობაზე თუ სად და ვისთან ერთად გადაადგილდებოდა ის. მისივე თქმით, მშობლებმა მოგვიანებით გაიგეს, რომ მათი შვილი კალანდიებთან იმყოფებოდა.
“სასამართლოზე შევთანხმდით, რომ ვინაიდან ამოწურული არ არის პროცესის მიმდინარეობა და შესაძლოა ის პირი, ვინც დღეის მდგომარეობით საზღვარგარეთ იმყოფება, დაბრუნდეს საქართველოში, ამიტომ ამ ეტაპზე აღნიშნული შუამდგომლობა აღარ დავაყენეთ და თუ პროცესის დასრულებისას თუ არ იქნება საქართველოში დაბრუნებული, ამ შემთხვევაში დავაყენებთ შუამდგომლობას გამოძიების ეტაპზე მის მიერ მიცემული ჩვენების გამოქვეყნების თაობაზე”, – განაცხადა საქმის პროკურორმა გიორგი ქობულაძემ.
ხორავას ქუჩაზე ორი მოზარდი 2017 წლის 1-ელ დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა, მეორე მოზარდი კი, ექიმების მცდელობისა და რამდენიმე ოპერაციის ჩატარების მიუხედავად, 2 დეკემბერს, საავადმყოფოში დაიღუპა.
არასრულწლოვნის, ლევან დადუნაშვილის განზრახ მკვლელობაში დამნაშავედ ცნობილ გ.ბ-ს სასამართლომ 10 წელი 6 თვე მიუსაჯა, ხოლო დამამძიმებელ გარემოებაში არასრულწლოვან დავით სარალიძის განზრახ მკვლელობის მცდელობაში ბრალდებულ გ.ჯ.-ს 9 წელი და 9 თვე მიესაჯა.
ხორავას ქუჩაზე, მოზარდების მკვლელობის საქმეზე, პროკურატურამ დანაშაულის შეუტყობინებლობის ბრალდებით რამდენიმე პირი პასუხისგებაში მისცა.