ორი შვილი მეზრდება და არანაირი თანამდებობა არ ღირს ადამიანის სიცოცხლედ. ჩემი გადადგომით უპირველესი გზავნილი საზოგადოებისადმი იყო ის, რომ ამ შემთხვევაში პროკურატურას ხელი არავისთვის დაუფარებია, – ამის შესახებ ყოფილმა მთავარმა პროკურორმა ირაკლი შოთაძემ საგამოძიებო კომისიის სხდომაზე განაცხადა.
„2015 წლიდან გავხდი მთავარი პროკურორი და ამ თანამდებობაზე ყოფნის პერიოდში ჩემი საქმიანობა მიმართული იყო პროკურატურის გაძლიერებაზე, განვითარებაზე, რეფორმირებაზე.
მე პირადად და მთელი საქართველოს პროკურატურაც ყოველთვის დაზარალებულების გვერდში იდგა და დღესაც ასეა. ორი შვილი მეზრდება და არანაირი თანამდებობა არ ღირს ადამიანის სიცოცხლედ. ჩემი გადადგომით უპირველესი გზავნილი საზოგადოებისადმი იყო ის, რომ ამ შემთხვევაში პროკურატურას ხელი არავისთვის დაუფარებია. ამ სისხლის სამართლის საქმეში არც ერთ პროკურორს ხელი არავისთვის დაუფარებია.
მე მივიღე გადადგომის გადაწყვეტილება და იმ სიბინძურეს, რაც იმ პერიოდში ჩვენი, პროკურორების მიმართ იყო, შევაფასებდი როგორც პოლიტიკურ ანგარიშსწორებას. გარკვეულმა პოლიტიკურმა ძალებმა ოჯახების ტრაგედია გამოიყენეს პოლიტიკური მიზნებისთვის და ერთ-ერთ სამიზნედ ამირჩიეს მეც,“ – განაცხადა ირაკლი შოთაძემ.