გრიგოლ ვაშაძემ საქართველოს საპრეზიდენტო არჩევნების შედეგები არ აღიარა და განაცხადა, რომ „საქართველოს პრეზიდენტი არ ჰყავს“. ის ვადამდელ საპარლამენტო არჩევნებს ითხოვს.
მას თბილისში BBC-ის რუსული ბიუროს ჟურნალისტი ოლგა ივშინა ესაუბრა. ვაშაძემ ინტერვიუში განაცხადა, რომ ზურაბიშვილი „არაფერს წარმოადგენს“ და ხალხს ქუჩებში გამოსვლისკენ მოუწოდა.
„რევოლუცია და თავისუფალი შეკრება – განსხვავებული ცნებებია. მოქალაქეებს აქვთ უფლება შეიკრიბონ ერთად და გამოხატონ თავიანთი აზრი. ჩვენ ცივილიზებული დასავლური პოლიტიკური პროცესის ნაწილი ვართ. ვიქცევით თუ არა პასუხისმგებლობით ყოველთვის? დიახ“, – განუცხადა ვაშაძემ BBC-ს.
„მე მხარი თითქმის 800 ათასმა ადამიანმა დამიჭირა. მათთვის ღირს ბრძოლაც და სიკვდილიც. დამიჯერეთ, არსად გავქრები. საკმაოდ პასუხისმგებლიანი ვარ რომ მივხვდე, როდესაც რუსული ტანკები თბილისიდან 40 კილომეტრშია, სიტუაციის ნებისმიერი ძალადობრივი განვითარება, ჩემს ქვეყანას საფრთხეს შეუქმნის“, – ჰყვება პრეზიდენტობის ყოფილი კანდიდატი.
კითხვაზე რატომ მიაჩნია ვაშაძეს, რომ ზურაბიშვილი „არავინაა“ ის აცხადებს, რომ მისი კანდიდატურა არაფერს წარმოადგენდა. „კანდიდატი იყო ბიძინა ივანიშვილი. ზურაბიშვილი არავინაა. რაიმე გაგიგიათ ჩვენი ე.წ. კანდიდატისგან? ან რაიმე სოციალური, პოლიტიკური ან ეკონომიკური პრობლემების განხილვა? რამდენი პრობლემა გვაქვს, და შემოგვთავაზეს ქალი, რომელსაც წარმოდგენა არ აქვს ქვეყანაში რა ხდება“, – აცხადებს ვაშაძე.
ჟურნალისტმა ვაშაძეს საქართველოს ყოფილ პრეზიდენტ მიხეილ სააკაშვილზეც ესაუბრა. „ყველამ იცის, რომ არჩევანი იყო ჩემსა და ივანიშვილს შორის. სააკაშვილს არაფერი აქვს საერთო ჩემს კამპანიასთან. სააკაშვილი ჩნდება ტელეეკრანებზე, მაგრამ შეხედეთ ჩემს პროგრამას ეკონომიკური და პოლიტიკური რეფორმების კუთხით. გსმენიათ რამე მისგან ისეთი, რაც ემთხვევა ჩემს შეთავაზებებს?
ვიმეორებ, მისი აზრი არის ერთი ადამიანის აზრი, რომელსაც არაფერი აქვს საერთო ჩემთან, ჩემს მომხრეებთან და გაერთიანებულ ოპოზიციასთან. მაგალითად, თუნდაც მისი მოწოდება სამოქალაქო დაუმორჩილებლობასთან დაკავშირებით“, – განუცხადა ვაშაძემ ჟურნალისტს.
„ყველაფერი, რაც პროფესიაში ვიცი, საბჭოთა დიპლომატიის სკოლიდან მივიღე, რისი დამსახურებითაც შევძელი, წინ აღვდგომოდი რუსულ აგრესიას. ეს ფანტასტიკური სკოლა იყო. დასავლელი დიპლომატებიც პატივს სცემდნენ. ეს იყო დიპლომატიის სხვაგვარი დონე, ფართო ენციკლოპედიური ცოდნით“, – ამბობს ვაშაძე BBC-სთან ინტერვიუში.
როგორც „ნაციონალური მოძრაობის“ პრეზიდენტობის კანდიდატმა აღნიშნა, რუსეთის საგარეო საქმეთა მინისტრიც საბჭოთა დიპლომატია, მაგრამ რუსეთის საგარეო საქმეთა სამინისტრო ნამდვილად არ არის ისეთი, როგორიც საბჭოთა კავშირის დროს.
imedinews.ge