საქართველოს პარლამენტის თავმჯდომარის მოადგილემ, ფრაქცია „საქართველოს პატრიოტების“ წევრმა, ირმა ინაშვილმა საპრეზიდენტო არჩევნების თემაზე ბრიფინგი გამართა.
ირმა ინაშვილის განცხადებით, ნაციონალური მოძრაობის მიერ საპრეზიდენტო არჩევნების შედეგებთან დაკავშირებით გუშინ, 2 დეკემბერს მოწყობილი აქცია, რომელზეც მათი მხარდამჭერები შეიკრიბნენ, კითხვებს ბადებს, რომელსაც გამოძიებამ უნდა გასცეს პასუხი.
„ეს აქცია მოხდა ჩვენი, 25 ნოემბრის მრავალათასიანი აქციის საპირწონედ. მინდა შეგახსენოთ, რომ ჩვენს აქციაში 100 ათასზე მეტი მხარდამჭერი მონაწილეობდა, რომელთაგან 85 ათასი თბილისიდან გამოვიდა, ყველა ასაკისა და პროფესიის ადამიანი, 14 ათასამდე ჩამოვიდა საქართველოს რეგიონებიდან. მნიშვნელოვანია, რომ აფხაზეთიდან ჩამოვიდა 124 მხარდამჭერი და ახალგორიდან – 85“, – განაცხადა ირმა ინაშვილმა და კონკრეტული შეკითხვები დასვა შესაბამისი სამსახურების ხელმძღვანელთა და ექსპერტთა საყურადღებოდ.
მისი თქმით, თუ პარტიას რეალურად ჰყავს 780 ათასი ამომრჩეველი, მის მიერ ორგანიზებულ აქციაზე მინიმუმ ოცდაათი ათასი მხარდამჭერი უნდა მოდიოდეს, ნაციონალების გუშინდელ აქციაზე კი სამი ათასი მხარდამჭერიც არ იყო, რაც სერიოზულ ეჭვებს აჩენს და გარკვეულ კითხვებს ბადებს. მისივე თქმით, საყურადღებოა ისიც, რომ ნაციონალურ მოძრაობას რეალურად 3 ათასამდე აქტივისტი ჰყავს, რომელიც ხან ერთ აქციაზეა თავმოყრილი, ხან მეორეზე.
„ამიტომ, მე როგორც პარლამენტის წევრი, ვითხოვ, რომ საქართველოს პროკურატურამ და შინაგან საქმეთა სამინისტრომ სასწრაფოდ დაიწყოს გამოძიება ნაციონალური მოძრაობის თითქოსდა 780 ათასი ამომრჩევლის რეალურობის დადგენის მიზნით. პირდაპირ ვამბობ, რომ ადგილი აქვს პოლიტიკურ აფერისტობას და ამ აფერისტობაში მონაწილეობს როგორც სააკაშვილ-ბოკერია, ისე მონაწილეობენ ქართული ოცნების ხელმძღვანელობიდან კონკრეტული თანამდებობის პირები“, – განაცხადა ირმა ინაშვილმა.
მისი თქმით, საინტერესო და გასარკვევია ის ფაქტიც, რომ არჩევნებზე მოსული ამომრჩევლის რაოდენობის ცვლილების მიუხედავად, უცვლელი რჩება ნაციონალური მოძრაობის მხარდამჭერთა რიცხვი – 780 ათასი. ასევე პასუხს საჭიროების კითხვაც, თუ როგორ ხდება, რომ წლების განმავლობაში არ იცვლება ნაციონალური მოძრაობის რეიტინგი, როდესაც მსოფლიოში ყველა პოლიტიკური პარტიის რეიტინგი მუდმივად განიცდის ცვლილებას. ირმა ინაშვილის განცხადებით, ამ კითხვებს უნდა უპასუხონ როგორც ხელისუფლების წარმომადგენლებმა, ასევე ექსპერტებმა. ბრიფინგზე ვიცესპიკერმა შინაგან საქმეთა მინისტრს, მთავარ პროკურორს და სახელმწიფო უსაფრთხოების სამსახურის უფროსს მიმართა.
„მივმართავ შინაგან საქმეთა მინისტრს, მთავარ პროკურორს, სახელმწიფო უსაფრთხოების სამსახურის უფროსს, სასწრაფოდ დაიწყოს გამოძიება ნაცმოძრაობის თითქოსდა 780 ათასი ამომრჩევლის რეალურობის დადგენის მიზნით და პლუს დაიწყოს გამოძიება იმ თანამდებობის პირების გამოსავლენად, რომლებიც ორგანიზებას უწევენ ამ დანაშაულს და ამ პოლიტიკურ აფერისტობას“, – განაცხადა პარლამენტის ვიცესპიკერმა.
ირმა ინაშვილმა ასევე მიმართა პარლამენტს, დროულად გაიტანოს სხდომაზე საქართველოს პატრიოტების მიერ შემოტანილი რეზოლუცია. „ნაციონალური მოძრაობა არის კრიმინალური დაჯგუფება, რომლის წევრებიც აუცილებლად უნდა გასამართლდნენ“, – განაცხადა ირმა ინაშვილმა.