საქართველოს ახლადარჩეული პრეზიდენტი სალომე ზურაბიშვილი 2019 წელს პრეზიდენტის ადმინისტრაციის ხარჯების შემცირებასთან დაკავშირებით აცხადებს, რომ ეს საბიუჯეტო პროცესია და არავითარი პრობლემა არაა. მის კომენტარს სააგენტო “ინტერპრესნიუსი” ავრცელებს.
“ნუ დარბიხართ, ვეღარ მიეჩვიეთ, რომ პრეზიდენტი ვარ? ეს არის საბიუჯეტო პროცესი, რომელიც მიმდინარეობს, შეტანილია ერთი პროექტი, რომელზეც ჩვენ დავიწყეთ ახლა მუშაობა, მიმდინარეობს თანამშრომლობა, არავითარი პრობლემა არაა”, – განაცხადა სალომე ზურაბიშვილმა.
2019 წლის სახელმწიფო ბიუჯეტის პროექტის ბოლო ვერსიით, რომელიც პარლამენტს უკვე გადაეგზავნა, პრეზიდენტის ადმინისტრაციის დაფინანსება 3 მილიონ 800 ათასი ლარით მცირდება. ბიუჯეტის პროექტის მიხედვით, ადმინისტრაციის დაფინანსება 6 მილიონი ლარი იქნება.
ასევე, 140-დან 60-მდე მცირდება ადმინისტრაციაში დასაქმებულთა რაოდენობა.
პროექტში გათვალისწინებული აღარ არის საქართველოს პრეზიდენტის სარეზერვო ფონდი, რომელიც ბოლო წლებში 5 მლნ ლარი იყო.