პარტია ქართული ოცნების გენერალურმა მდივანმა წინასაარჩევნო პერიოდში მიმდინარე აგრესიულ კამპანიაზე და ტელევიზიით გამოთქმულ უცენზურო გამონათქვამებზე ისაუბრა. კახა კალაძის განცხადებით, ტელევიზიას დიდი პასუხისმგებლობა აკისრია მომავალი თაობისთვის და ასეთი დამოკიდებულებით საუბარი პირდაპირ ეთერში არ შეიძლება, რადგან ეს ერთგვარ წახალისებას აძლევს დაპირისპირებას.
“ჩემთვის ყველანაირი ძალადობა მიუღებელია, ასევე ფსიქოლოგიური ძალადობა, რასაც ჩვენ ამ არჩევნების განმავლობაში ვუყურებდით, ვისმენდით კონკრეტული ტელევიზიიდან და კონკრეტული პიროვნებების მხრიდან. პირდაპირი ვიტყვი, ჩვენ ვისმენდით ფაშისტურ განცხადებებს, რაზეც საზოგადოების მხრიდან არ იყო რეაგირება, აი ეს იყო ჩვენი შეცდომა, არავითარ შემთხვევაში არ უნდა დავუშვათ ბილწსიტყვაობა, ზოგადად, ძალიან დიდი როლი აქვს ტელევიზიას და უდიდესი პასუხიმეგბლობა ეკისრება ამ მიმართულებით, არ შეიძლება პირდაპირი ეთერიდან ვისაუბროთ ამ სიტყვებით, როდესაც ამას უყურებენ პატარები, ახალგაზრდები და ზოგადად მომავალი თაობა”- განაცხადა კახა კალაძემ ტელეკომპანია “იმედი”-ს გადაცემაში “პირისპირ”