საქართველოს შინაგან საქმეთა მინისტრმა გიორგი გახარიამ ველისციხეში განვითარებულ მოვლენებთან დაკავშირებით პირველი კომენტარი ჟურნალისტებთან გააკეთა.
“რამდენიმე ალტერნატიული გზა იყო შეთავაზებული. თუმცა, როგორც ჩანს ზოგიერთებს თავიანთი გეგმა ჰქონდათ, რომელსაც მიჰყვნენ. მთავარია დღევანდელი დღე მშვიდად და წყნარად დასრულდეს, პორველი რიგში მინდა ბოდიში მოვუხადო თითოეულ პოლიციელს და მადლობა ვუთხრა მათ იმის გამო, რის თმენაც მათ დღეს მოუწიათ. მე ვპირდები მათ, რომ ხვალიდან თითოეულ პროვოკაციას სამართლებრივი შეფასება მოჰყვება. ყველა, განურჩევლად მათი სტატუსისა, ყველა იქნება პასუხისგებაში მიცემული, სადაც დანაშაულის შემადგენლობას დავინახავთ. ამას ვპირდები მე, პირველ რიგში, ჩემს თანამშრომლებს, ჩემს პოლიციელებს,“ – განაცხადა გახარიამ.
გურჯაანში, სოფელ ველისციხესთან ნაციონალური მოძრაობის ლიდერები და მხარდამჭერები არიან შეკრებილნი. სამართალდამცველებს საქართველოს პრეზიდენტის ინაუგურაციასთან დაკავშირებით, თელავის მიმართულებით გზა გადაკეტილი აქვთ და აქციის მონაწილეებს თელავში ჩასვლა ყვარლის გავლით შესთავაზეს, რაზეც მათგან უარი მიიღეს. ოპოზიციის წარმომადგენლებმა ცოტა ხნის წინ პოლიციის კორდონის გარღვევა ავტომობილებით სცადეს. ამასთან, ნაციონალური მოძრაობის წევრებმა სამართალდამცველების ავტობუსს ქვები დაუშინეს.
საქართველოს შინაგან საქმეთა სამინისტრომ პრეზიდენტის ინაუგურაციასთან დაკავშირებით დღეს განცხადება გაავრცელა, რომელშიც აღნიშნული იყო, რომ კახეთის მიმართულებით და ქალაქ თელავში საავტომობილო გზებზე ტრანსპორტის მოძრაობა დროებით შეიზღუდებოდა.