პაატა რუსაძე – საპენსიო რეფორმა ევროპული არჩევანია

„საპენსიო რეფორმა ევროპული არჩევანია. ეს ის ნაბიჯია, რომელიც ქვეყანამ უნდა განვლოს, უკეთესი მომავლისთვის“, – აცხადებს კომპანია “ჯეოტურანი”-ს დამფუძნებელი, პაატა რუსაძე და საქართველოში საპენსიო რეფორმას აფასებს.
მისი თქმით, საპენსიო რეფორმის დაწყება საუკეთესო გადაწყვეტილებაა.
ამასთან, პაატა რუსაძე აცხადებს, რომ ყველა ქვეყანაში საპენსიო პოლიტიკის მთავარი ამოცანა მოსახლეობის ღირსეული პენსიით უზრუნველყოფაა და მას სჯერა, რომ ამ მხრივ, არც საქართველო იქნება გამონაკლისი.
„ჩემს კომპანიაში, მისი სპეციფიკიდან გამომდინარე, ძირითადად, ახალგაზრდები არიან დასაქმებული, მათთვის საპენსიო დაგროვებითი სისტემა სულაც არ არის სიახლე, რადგან ხშირად უწევთ უცხოეთში ვიზიტებით წასვლა, გადამზადების, ტრეინინგების, თუ კონფერენციების ფარგლებში. ჩვენ კარგად გვესმის, რომ საპენსიო რეფორმა ევროპული არჩევანია, ეს ის ნაბიჯია, რომელიც ქვეყანამ უნდა განვლოს უკეთესი მომავლისთვის.
საპენსიო შენატანი დასაქმებულისა და დამსაქმებლის მხრიდან იმდენად მინიმალურია, რომ ის გავლენას ვერ მოახდენს საერთო სურათზე. ამის გამო, არცერთი დამსაქმებელი უარს არ იტყვის კარგ კადრზე და პირიქით, სოციალური სოლიდარობიდან გამომდინარე, იზრუნებს თავისი კადრების ღირსეულ მომავალზე.
აი, ამიტომ, ჩემი კომპანია 2019 წლის იანვრის დასაწყისშივე ჩაერთო დაგროვებით საპენსიო სქემაში.
სხვა ქვეყნების მსგავსად, სადაც საპენსიო რეფორმა იწყებოდა, ჩვენთანაც დაგროვებითმა საპენსიო რეფორმამ აზრთა სხვადასხვაობა გამოიწვია, რაც ნორმალურია. არიან ამ რეფორმის მხარდამჭერები და ასევე, 90-იან წლებში დეპოზიტების დაკარგვით იმედგაცრუებულები.
უნდა აღინიშნოს, რომ წლების წინ ასეთივე უნდობლობა იყო კომერციული ბანკების მიმართ, ხოლო ამჟამად ეს პრობლემა ამოწურულია და საქართველოს ეროვნული ბანკის ინფორმაციით, 2018 წლის დეკემბერში, ფიზიკური პირების მიერ კომერციულ ბანკებში განთავსებული დეპოზიტი ეროვნულ ვალუტაში აჭარბებს 2,8 მლრდ ლარს, ხოლო უცხოურ ვალუტაში – 9,5 მლრდ ლარს.
ყველა ქვეყანაში საპენსიო პოლიტიკის მთავარი ამოცანაა მოსახლეობის ღირსეული პენსიით უზრუნველყოფა, მე მჯერა, რომ არც საქართველო იქნება გამონაკლისი“, – ამბობს კომპანია “ჯეოტურანი”-ს დამფუძნებელი, პაატა რუსაძე.
შეგახსენებთ, რომ 2019 წლის პირველი იანვრიდან საქართველოში დაგროვებითი საპენსიო სისტემა ამოქმედდა. რის თანახმად, 40 წლამდე ასაკის მოქალაქეებისთვის საპენსიო რეფორმა სავალდებულოა, ხოლო 40 წელს გადაცილებული მოქალაქეებისთვის – ნებაყოფლობითი.
დაგროვებითი პენსიის კანონი პარლამენტმა 21 ივლისს მიიღო. სისტემის ამოქმედების შემდეგ, მოქალაქეების მიერ დაზოგილ თანხას სპეციალური საპენსიო ფონდი განკარგავს, აღნიშნულ ფულს გარკვეულ საპროცენტო განაკვეთს დაარიცხავს და მოქალაქეებს ამ თანხას პენსიაზე გასვლის შემდეგ დაუბრუნებს.