მე ვაგრძელებ დავას ეროვნული ბანკისა და პროკურატურის წინააღმდეგ საქართველოში და მის ფარგლებს გარეთ, რადგან მიმაჩნია, რომ რაც ჩვენს წინააღმდეგ მოხდა, სცილდება ყოველგვარ ნორმას და ზღვარს, – ამის შესახებ პარლამენტის საფინანსო საბიუჯეტო კომიტეტის სხდომაზე „თიბისი ბანკის“ დამფუძნებელმა, მამუკა ხაზარაძემ განაცხადა.
მისი თქმით, აღნიშნულ საკითხზე საქართველოში ძალიან ბევრი დელეგაცია ჩამოვიდა. მათ თქვეს, რომ ამ ფორმატში ანაკლიის პროექტს ხელს ვერ მოაწერდნენ.
„საქართველოში ჩამოსული იყო ძალიან ბევრი დელეგაცია ამ საკითხთან დაკავშირებით. არ დარჩენილა არც ერთი ევროპული ელჩი და ბანკის პირველი ან მეორე პირები, რომლებიც არ ჩამოვიდნენ, ცალ-ცალკე არ შეხვდნენ მთავრობას, ეროვნულ ბანკს და ეუბნებოდნენ, რომ ასეთი მიმართულებით ამ საკითხის განვითარება არ შეიძლება, ასევე ეუბნებოდნენ, რომ ანაკლიის პროექტს ჩვენ ამ ფორმატში ხელს ვერ მოვაწერთ. მე დაგანახეთ, რომ არც ბანკს ვეფარები და არც ანაკლიას. გადავდექი, რომ არ ჩამეყენებინა ბანკი მძიმე მდგომარეობაში“, – განაცხადა მამუკა ხაზარაძემ.
მისი თქმით, განვითარებული მოვლენების ფონზე აღნიშნული კონტრაქტის დახურვა წარმოუდგენელია.
„წარმოუდგენლად მიმაჩნია, რომ ჩვენი მონაწილეობით ამ სიტუაციაში მოხდეს ამ კონტრაქტის დახურვა“, – განაცხადა ხაზარაძემ.