სავალდებულო სამხედრო სამსახურთან დაკავშირებით ირაკლი სესიაშვილის კანონპროექტის განხილვა დროებით გადაიდო. პარლამენტის თავდაცვისა და უშიშროების კომიტეტის თავმჯდომარემ, ირაკლი სესიაშვილმა ამის შესახებ დღეს, პარლამენტის ბიუროს სხდომაზე განაცხადა. მისი თქმით, კანონპროექტზე მუშაობა გაგრძელდება.
„პროექტმა გარკვეული უთანხმოება გამოიწვია საზოგადოებაში, მათ შორის, ადგილი ჰქონდა სპეკულაციას. რამდენადაც ჩემი პროექტის მიხედვით არანაირი მინიშნება ან მითითება არ არის რომელიმე კონფენსიისთვის უპირატესობის მინიჭების თაობაზე, ჩემთვის, როგორც თავდაცვისა და უშიშროების კომიტეტის თავმჯდომარისთვის მთავარი ამოცანაა, რომ რამდენადაც გაწვევის სისტემას შეექმნა ძალიან სერიოზული პრობლემა. მიზეზი კი გახლავთ ის, რომ ზოგიერთი რელიგიური ორგანიზაცია არაკეთილსინდისიერად იყენებს ამ მოცემულობას.
ამიტომ, ჩემი ინიციატივა ამას ეფუძნებოდა, თუმცა რამდენადაც საზოგადოებაში გაჩნდა გარკვეული მოსაზრება, რომ შეიძლება ამას ჰქონდეს დისკრიმინაციული ხასიათი, ვთავაზობ ჩემს კოლეგებს ყველა პოლიტიკურ ძალას რომ ამ თემასთან დაკავშირებით გავაგრძელოთ კონსულტაციები“, – განაცხადა ირაკლი სესიაშვილმა.